منتدى الفرح المسيحى - #الحياة_زي_ابنك

#الحياة_زي_ابنك_الصغير
⬅️ هاتكلم عن اهم مبدأ في الحباة. واللى كلنا بننساه.
لما تكون انت ك أب او أم شايف ابنك الصغير بيجري في البيت وتلاقي طرف السجادة مرفوع والطفل بيبص وراه ومش شايف طرف السجادة بتتوقع انه هايخبط في طرف السجادة ويقع . . . وبالفعل بيحصل. والطفل بيقوم يضحك على الموقف الطريف ده. وانت كمان بتضحك.
نفس الحال في حياتنا.
لما تكوني عامله عزومه. اوعي تفكري ان الامور هاتمشي ١٠ / ١٠.
مستحيل. وعادي جدا ان يبقي فيه حاجه ناقصه ملح. او انك تنسي العيش دي كلها حاجات بتحصل لكل الناس فلازم تتعاملى مع الموقف زي ما اتعاملتي مع ابنك ( بابتسامه ).
لما تكون هاتروح شغل جديد. او تفتح مشروع . اوعي تفكر ان الدنيا هاتبقي وردي . . . مستحيل. اكيد هاتلاقي عقبات ومشاكل. ولازم تكون متوقع ده. وتتعامل معاه زي ما اتعاملت مع ابنك ( بابتسامه ).
لما تكون بتبني بيت جديد. او هاتخطب او هاتتجوز. اوعي تفكر ان الامور هاتعدي بدون اي سلبيات . . . مستحيل لازم تبقي عارف ان فيه حاجات مش هاتيجي على مزاجك. ولازم تتعامل ( بابتسامه ).
لما تكون رايح مشوار. اوعي تفكر ان الطريق هايبقي سهل وكل حاجه هاتبقي جميلة . . . عادي جدا ان الطريق يبقي واقف. وعادي جدا ان العجلة تنام. وعادي جدا انك تتأخر. ولازم تتعامل ( بابتسامه ).
⬅️ أهم مبدأ في الحياة. واللى كلنا بننساه ⬅️ ( الكمال لله وحده ).
⬅️ طبيعة الحياة كده. فيها عقبات ومافيش حاجه بتبقي كامله ابدا.
⬅️ اتعامل مع الحياة من غير عصبيه. كأنها ابنك الصغير اللي انت متوقع تصرفاته. وبتضحكو سوا مع بعض لما يحصل اللي انت توقعته.
⬅️ وطبعا البوست ده مش تشجيع على ( اللامبالاة ). اطلاقا.
بس لما تكون بتعمل حاجه وتطلع معاك مظبوطه بدرجة ٩٠ % . ماينفعش ابدا تقعد تحرق في اعصابك. لانك بكده هاتفضل طول حياتك ماشي بالعلاج.