منتدى الفرح المسيحى

- وهو الله لسا بيحضُن ؟

- طبعاً بيحضُن .. بكل شخص وعلاقة حسيت فيها انك مقبول ومحبوب زي ما أنت من غير ما تبذل مجهود.

الله بيحضُن.. بكلمتين "يبلّوا الريق" من حد بيحبك بجد وسط عالم ناشف كله بيكسر في بعضه.

الله بيحضُن.. بكل شخص شافك وأنت تايه وخدك في حضنه وقت طويل من غير ولا كلمة.. حُضن اطمنت فيه وسِبت روحك ترتاح من غير حسابات كتير.

الله بيحضُن.. بـ "لمعة عين" حد بيسمعك وأنت بتبكي فا يبكي معاك من غير وعظ ونصايح كتير..

الله بيحضُن.. بحد شافك في أوحش حالاتك من غير تجميل ومجهود أنك تبان كويس.. وقالك "أنا لسا شايفك غالي .. ومش هامشي".

الله بيحضُن.. بكل اهتمام وحُب استقبلته من حد مش مستني منك مقابل وكل همّه بس انك تبقى كويس مش حاجة تاني.

الله بيحضُن.. بكل لمسة وحضن جسدي "نضيف".. هدفه بس يحسّسك بالأمان، ومفيش من وراه غرض تاني أو استغلال بأي شكل.

الله بيحضُن.. بكل حد دخل لأعماقك وشاف الجزء "الهش" اللي جواك واحتضنه وهو حاسس بتفاصيل الوجع والكسرة اللي في روحك من غير فلسفة وكلام كتير.

الله بيحضُن كل يوم ألف مرة.. بس اللي يستقبل :)