منتدى الفرح المسيحى - ربنا يسامح اللي كان السبب

من كام سنه كنا بنحب بعض .. كل حاجه ف مصر كانت حلوه .. رمضان كان "كريم" فعلآ .. الفوانيس كانت ف ايد الاطفال المسيحيين قبل المسلمين .. كان شهر كله بهجه و سعاده وفرح .. زينه ف الشوارع .. لمه ف البيوت .. عمو فؤاد وبكار و فطوطه وفوازير شريهان والكاميرا الخفيه .. والمال البنون .. برامج ومسلسلات كانت شيك و محترمه شبه الناس ف الزمن ده .. مكنتش تعرف تفرق بين "مينا" و"محمد" .. و كانت "زينب" تشبه ل "كيرستين" .. ف الشكل واللبس والروح .. دلوقتي اتغيرنا واتغير كل الحلو اللي فينا .. واتحول "التدين" ل "تعصب" وتطرف .. دلوقتي البنت بتخاف تمشي ف الشارع في نهار رمضان علشان متسمعش كلمة "اللهم اني صايم" .. وكأنها "حرام" و كأن من حق الأخ اللي صايم انه يتحكم ف حريات غيره .. الشارع بقا غابه و البقاء فيها للاقوي .. اختفت منه مظاهر البهجه والسعاده واتبدلت ب مظاهر غريبه ف الشكل والاخلاق والمظهر .. وكأننا صحينا من نومنا لقينا "مصر" بقيت "ايران" .. حتي اللمه اللي كانت ف البيوت اتفركشت .. بقا كل واحد فينا عايش مع "موبايله" والونس الكداب الموجود ف ال face و ال whats .. حتي البرامج والمسلسلات بقيت كلها دم وضرب و عنف و قتل .. وبقينا عايشين ف "كابوس كبير" .. و أيام شبه بعضها
ربنا يسامح اللي كان السبب !