منتدى الفرح المسيحى - ياواخد روحي برصاصك

ياواخد روحي برصاصك
وكاسر قلب احبابي
وماسح دمي ف نعالك
وانا واقف على بابي
عملت انا ايه
تحاسبني عليه
ومين انت عشان تيجي
وتقبض بالرصاص روحي
وتتلذذ بشكل الدم
وتتلذذ بصوت نوحي
قتلت خلاص ؟
فرحت اني بقيت ذكرى
انا موتي مهوش نقمة
ده مكسب غالي على فكرة
ومش زعلان ، انا شاكرك
عشان اديتني اكليلي
ومش حابب اشوف شكلك
عشان راح تكسرك عيني
انا الكسبان ، لإني خلاص
سرقت سمايا برصاصكم
ولو روحي تعود " لحظة "
لـ أجي احب فوق راسكم
واقول شكراً لإكليلي
يا داود ياللا غنيلي ...

مايكل سامي