منتدى الفرح المسيحى

محناش ضيوف
راجع التاريخ
علشان تشوف
وعددنا مش ميه وميتين
ملايين كتير ، اجمع وشوف
وبلاش غلط ،، وبلاش امور السيطرة
ليه يا ترى احنا ورا !!
علشان مخاخنا في الهبل
شيلوا الجبل ، وعمروها بالخضار
ابنولنا دار ،،
وشيّدوا ابراج كتير ، مش للحمام
ابراج عماير هندسة
وكفاية ارجوكم أسى ،،
الناس بتسبقنا هناك
واحنا هنا
قلعّنا واحدة لبسها
ونفسنا نبيع الهرم
حرقنا ياما بيوت كتير
حتى الأوزون فوقنا اتخرم
وضربنا ضيفنا ع الهوا
وقلوب اباء
على دم ابنائها انكوى
اه يا هوى ،،
تفجير شوارع ليل نهار
ورصاص علامة للحصار
وجنود يوماتي بتتقتل ،، والناس ياعيني بتتهطل
حتى السما منّا اشتكت
وقت اما طيراننا انفجر
شعب غجر ،،
اتلموا ،، جايز تنضفوا
وكفاية شر
واهم شئ من كل ده
كونوا بشر ،،
وارجع واقول من غير كسوف
متعلقوش كل المصايب ع الظروف
مش راح يخوفنا السلاح
ولا راح هترعبنا السيوف
علشان ياشعب محترم
#ماحناش_ضيوف