منتدى الفرح المسيحى - الحاجة ديه لربنا

https://files.arabchurch.com/upload/i.../981088262.png

كام مرة عملت حاجة كويسة لحد واكتشفت في الأخر انه مايستهلش؟!

بنعمل حاجات كتير لناس ومن جوانا بنقول أحنا بنعمل علشان ربنا، حتى لو مش مقتنعين باللي بنعمله!!

لما بفكر بقول هو ربنا محتاج مني حاجة أعمله اصلا؟، لو أنا بعمل ده بناء على الأية اللي بتقول بما أنكم فعلتم بأحد أخواتي الأصاغر فبي فعلتم، فلازم نكون عارفين أن الأية دي مش بتقول خالص أننا نعمل حاجة وأحنا مش مقتنعين بس علشان احنا بنعمل لربنا، لكن نعمل ونساعد الغير وأحنا عايزين وحابين نعمل كده من جوانا.

ربنا مش محتاج نعمله حاجة، لكن هو بيعلمنا نقدم لبعض بمحبة بدون دمدمة أو تذمر، بدون كبرياء أو تفاخر، وكل ده هيرجع في الأخر لخيرنا هو قال ” اِرْمِ خُبْزَكَ عَلَى وَجْهِ الْمِيَاهِ فَإِنَّكَ تَجِدُهُ بَعْدَ أَيَّامٍ كَثِيرَةٍ” (جامعة 11: 1)، يعني الخير اللي هتعمله هيرجعلك أكيد، بس متبقاش عامل الخير ومداين ربنا بيه كأنك عامل فيه خير أو معروف لأن هو نفسه الخير.

خلي بالك من دوافعك

صدقني الدافع والاتجاة بيبان جداً وأنت بتعمل أي حاجة وبيفرق كمان، لو عملت حاجة بدافع المحبة محبتك هتوصل وهتغير اللي قدامك، لو عملت حاجة بدافع أعمل اللي عليا هتوصل برضه للي قدامك وهيحسها. متعملش حاجة لله… أعمل حاجة علشان بتحب الله.