منتدى الفرح المسيحى - نفسي العزيزة .. تحية طيبة و بعد .

نفسي العزيزة ..
تحية طيبة و بعد ..
بقالي كتير ماكلمتكيش ..
بقالي كتير ماطمنتش عليكي ..
عاملة ايه ؟
مش بسألك عن الشغل و الدنيا ..
ما هو ده أصلاً اللي شاغلني عنك ..
انا بسألك ...... عنك ..
عاملة ايه مع ربنا ؟؟
بتكلميه ؟
بتناجيه ؟
في وقت العوز .. سألتيه ؟
و لا حوجتي نفسك للي زيك محتاجين ؟
حوجتي نفسك للي يذلك .. و برضه مش هيديكي حاجة ؟
طيب ماسألتيش ربنا ليه ؟!
هه !!
مكسوفة ؟!
مكسوفة من ذنوبك و اثمك ؟
حلو الكسوف .. حلو الاحساس بالذنب ..
بس المفروض دا مايخلكيش تبعدي ..
مش قلت لك دايماً سيبي الباب موارب ..
ماتقطعيش كل الحبال ..
هايجي يوم و تحتاجي تدخلي عليه ..
ممكن تحسي انه مش قابلك .. يصدك ..
مرة و اتنين و تلاتة ... ماتيأسيش ..
اصل ماتنسيش ...
انتي اللي بعدتي كتير ..
هو بس عاوزك تعرفي قد ايه انت محتاجه له ..
عاوزك تتأكدي انك من غيره و لا حاجة ..
و هو فعلا انت من غيره و لا حاجة ..
ناطحي و صارعي و اجري جري الوحوش ..
في الاخر هاتتعبي .. و هاتوصلي للحقيقة ..
انك و لا حاجة ..
انت صلاة ..
انت دعوة ..
انت لحظة صدق ..
انت لحظة اخلاص ..
انت طاعة لله ..
لو فقدتي دول ...
تبقي و لا حاجة ..
هاتقعدي كده مستنية و معشمة نفسك بلحظة العودة و الإياب ..
عمالة تقولي .. لا ما انا مش هابعد اوي ..
و مسيري هارجع ..
و انتي مش واخدة بالك انك و انتي بتقولي كده ..
بتبعدي اوي ..
العمر بيتسرب من بين صوابعك ..
ماشية زي المنومة مغناطيسي ..
عاوزة تصرخي و الشيطان ملجم لسانك ..
عاوزة تقولي كفاااااية ..
و في ايدك تقولي كفاية ...
كفاااااية ..
إلى نفسي العزيزة ..
اتعدلي احسن لك ..
و السلام ختام ...
ده لو عاوزة السلام