منتدى الفرح المسيحى

امبارح كنت بشترى حاجات من محل ما ، ست كبيرة بترجع لورا بضهرها داست ع رجلى
أنا صرخت بصورة غير منطقية لدرجة إن الست بصتلى بإستغراب !!
اعتذرت أيوة بس شوفت ف عيونها معنى " أنا مادوستش جامد لدرجة انك تتألمى كده " !
ساعتها قولتلها معلش أصل صوباعى متعور ف ألمنى جدا
فضلت تطبطب عليا و تعتذر كتير وانها ماقصدتش ولا تعرف إنى متعورة
إهتمامها ده و خوفها من إنها وجعتنى خلانى حسيت ب سلام جوايا 😌
الموقف ده خلانى انتبهت لحاجه .. إننا ساعات بنغلط بدون قصد فى ناس سواء قريبين او لأ ، وبنتفاجئ برد فعلهم القوى على الغلطة دى
بس الفكرة إن الغلطة من وجهة نظرنا بتكون بسيطة وتافهة ولا تستحق - لكن احنا منعرفش جوا الشخص ده اي
يمكن دوسنا ع جرح موش شايفينه ، يمكن وجعهم كان أكبر من تقديرنا للموقف 💔 !!
عشان كدا لما تتفاجئ برد فعل غير متوقع .. خليك إنت أحسن . طبطب ع الشخص ده حتى لو موش قريب ليك ، مجرد انه يحس إنك حاسس بألمه هيفرق معاه أوى و هيخفف عنه ✋