منتدى الفرح المسيحى - البشر زي اللوحات..

https://upload.chjoy.com/uploads/1492249647271.jpg

كل اللي زاروا "اللوفر" في فرنسا، من معارفي،
قالولي إن لوحة "الموناليزا" على الحقيقة مش بالنقاء والجمال اللي بتبان بيه في الصور..

دي ظاهرة متكررة مع كل اللوحات عمومًا.. أنا شخصيًا مريت بيها مع كذا لوحة،
كنت بأشوفهم على الإنترنت، قبل ما أحضر المعرض وأشوفهم على الحقيقة.

والبشر كده بردو.. البشر زي اللوحات..

كل ما تقرب مني، هتشوف الرتوش والتجاعيد اللي سابها فيا الزمن..
القرب مش جميل زي ما أنت فاكر..
أكيد أنا أسوأ من الصورة الجميلة المبهرة اللي أنت راسمهالي في خيالك..

القرب يعني تفاصيل كتير جدًا.. أولها إنك مجبر تتحمل عيوبي.. تعرفها؟
لا طبعًا! أنت تعرف الحلو بس، المبهر.

فيه ناس جميلة أوي، بتفضل تتابعك كده، من بعيد لبعيد،
يقروا كل بوست أو تويتة تكتبها، كل مقالة، ويشوفوا كل صورة، ويكتفوا باللايك..
حتى اللايك نفسه أحيانًا مش بيعملوه! دول بقى اللي فاهمين صح..

طول ما أنا بالنسبالك صورة وكام كلمة مكتوبين تحتهم على شاشة كومبيوتر أو موبايل؛
هفضل جميل، مريح..
لكن تتحملني وكده، في الواقع،
وتستحمل قرفي وإحباطي وجنوني؟ يا راجل! كبَّر مخك.
Cpd