منتدى الفرح المسيحى - نهايه من اخراج يسوع .......

https://upload.chjoy.com/uploads/1492112966083.jpg

اللي بيحصل معانا دلوقتي نفس اللي حصل مع المسيح زمان .. من 2000 سنه .. بالتفاصيل ..
وبرضه كانت ف ايام عيد .. "عيد الفصح" .. وكأن الزمن بيتعاد

https://upload.chjoy.com/uploads/1492112965711.jpg

فينا اللي زي "العدرا مريم" ..
الأم اللي شافت ضناها بيروح منها قدام عينيها .. وجاز ف نفسها سيف وهي ساكته ..
واللي شافها قال عليها جبل .. و ب 100 راجل

فينا اللي زي "المريمات" ..
اللي مفيش ف ايديهم حاجه غير الدموع والبكا ..
بس دموعهم ف عيون ربنا صلاه .. و بكاهم غالي عنده

فينا اللي زي "بطرس" ..
اللي عايز ياخد حقه بايده ويجيب تاره عين بعين و سن ب سن ..
بس المسيح هيعلمه ان الحب اقوي من السيف و الغفران اعظم م الانتقام

فينا اللي زي "بيلاطس" ..
شايف الحقيقه ولكنه اعمي .. او عايز يفضل اعمي ..
المهم انه يغسل ايديه م الدم

فينا اللي زي "يهوذا" ..
اللي لسه بيبيع و بيخون ..
وف وقت الشده غاب .. و ساب اللي ياما شاله علي كفوف الراحه

فينا اللي زي "باراباس" ..
اللي حياته اتغيرت مليون درجه ..
و الدم اداله حريه من عبودية ابليس

فينا اللي زي "اللص اليمين" ..
اللي خطف الملكوت علي اخر لحظه ..
وسرق الابديه ب كلمه و نظرة رجاء

فينا اللي زي "سمعان القيرواني" ..
اللي مفيش ف ايديه حاجه غير انه يشيل مع المصلوب ..
ويخفف عن المتألمين احمالهم ..

https://upload.chjoy.com/uploads/1492112965982.jpg

فينا اللي زي " يوحنا الحبيب " ..
اللي الظروف خلته يقرب اكتر من ربنا .. ويفضل معاه للأخر ..
و كل ما الدنيا تضيق .. كل ما يتمسك بيه اكتر

بس زي ما بنعيش زمن "الألم والصلب" .. قريب هنعيش زمن "القيامه" ..
وهترجع الفرحه تغلب دموع الحزن .. و الحدوته هتخلص بنهايه حلوه ..
نهايه من اخراج يسوع 💝

" مينا مجدي "