منتدى الفرح المسيحى - الغفران مش احساس ..

لأَنِّي الْحَقَّ أَقُولُ لَكُمْ: إِنَّ مَنْ قَالَ لِهذَا الْجَبَلِ: انْتَقِلْ وَانْطَرِحْ فِي الْبَحْرِ! وَلاَ يَشُكُّ فِي قَلْبِهِ، بَلْ يُؤْمِنُ أَنَّ مَا يَقُولُهُ يَكُونُ، فَمَهْمَا قَالَ يَكُونُ لَهُ.
- مرقس 11: 23 -

لو الموضوع سهل كده زي ما الرب يسوع بيقول،
مجرد اقول للجبل اللي في حياتي " انتقل وانطرح في البحر "
وميكونش عندي أي شك هيحصل الكلام اللي بقوله..
طب ليه انا لسه بعاني في حياتي وعندي مشاكل كتير أنا مش عارف أحلها ولسه الجبال فوق كتافي موجودة؟!

كلنا بنمسك في الوعد ده وبنقوله يارب مش انت قلت انا ليه مش بيحصل معايا كده؟
فيه حاجات كتير الرب يسوع قالها وقال اننا نقدر نعملها بما اننا أولاده،
بس كان دايمًا بيبقى فيه شرط لازم نعمله علشان الحاجة دي تتحقق والشرط في الكلام ده، موجود في نفس الاصحاح عدد 25
" وَمَتَى وَقَفْتُمْ تُصَلُّونَ، فَاغْفِرُوا إِنْ كَانَ لَكُمْ عَلَى أَحَدٍ شَيْءٌ " ..

الغفران مش احساس ..
الغفران قرار إرادي انت بتختاره علشان انت عارف انها وصية الرب وانه من غير الشرط ده انت مش هتقدر تكمل مشوارك، الغفران صعب ..
أه وخصوصًا لما يكون من شخص قريب انت عارفه وبتعزه، بس الأصعب منه انك تبقى حاسس انك لوحدك من بره ومن جوه كمان،
عدم الغفران بيفصل التواصل بينك وبين ربنا وطول ما جوايا مراره وعدم غفران مش هقدر انقل أي جبل في حياتي ..
والقرار ليك النهاردة تختار تمشي السكة دي حتى لو صعبه ولا تفضل بالجبل على كتافك؟!