منتدى الفرح المسيحى - دستور النسيان

دستور النسيان
https://upload.chjoy.com/uploads/1490458770281.jpg

صدقيني ده مش حب ، اللي انتي فيه دلوقتي شعور بالانكسار ،
وخناقه دايره جواكي بينك وبين نفسك ،
ندمانه انك اديتي بدون مقابل ، وفِي النهايه خطف وجري بمنتهي النداله ،
طلع عيل ، سرق شويه حب ، شويه عمر ، صنع جواكي احلام وهميه ،

مشي ؟
صدقيني في داهيه ،
اهم حاجه ماتضحكيش علي نفسك وتقولي نفسي يرجع علشان انتقم ،
ده اكبر غلط ، الكراهيه وجع دايم ، سامحيه بدون غفران
قولي عبيط وخسر كتير ، الأهم دلوقتي تستعيدي علاقتك بذاتك ،
ارجعي حبي نفسك ، اعملي كل حاجه كنتي بتحبيها ،
حبك له كان سجن وغمامه وحائل بينك وبين احلام كتير،
وناس كتير ، استرديهم كلهم دفعه واحده ،
كأنك بتخدي عمرك الجاي بالحضن ،

لسه موجوعه ؟
حاسه انك مستحيل ها تنسيه ؟
مش متخيله سيناريو حياتك الجاي من غيره ؟

انا حافظه المشاعر دي ، وسمعتها من مليون بنت انكسرت قبلك ،
علشان كده حافظاها وحاساها وعارفه تاريخ صلاحيتها ،
صدقيني كل دي مشاعر تعود ، مش حب ،
وطالما تعود يبقي حلها الوقت ، هايعدي زمن وتنسيه ،
يمكن شهر، يمكن سنه، يمكن ٢٠ سنه ،
حسب القرار اللي هاتخديه دلوقتي والاجابه علي سؤالي :

مين دلوقتي اهم ؟
مين اغلي عندك ؟
مين يستاهل تحزني علي خسارته ؟
هو ولا نفسك ؟

لو هو اغلي برغم كل اللي عمله !!
تبقي نفسك رخيصه اوي عندك ، يبقي ماتستاهليش تنسي ولا تعيشي ،
خساره فيكي الحياه ، الله يرحمك ، كنتي في يوم انسانه حره ،
بقيتي جاريه مسجونه جوا تجربه تافهه ،
يلاانتي كمان في داهيه .

لااااااااااااااااااااااااااااااااااااااااااااااا
انتي مش كده خالص واوعي تقبلي تكوني كده ، كرامتك اعظم ، كبريائك ابقي ،
انتي انسانه حره ، نفسك اغلي كتيير عليكي ،
هو خلاص من دلوقتي هايبقي ماضي ،اوعديني ،
حتي لو رجع هاترفضيه ، اوعدي نفسك ،،
انتي حره ، مش سجينه ، مش جاريه افهمي ،
توبي عن الحب الفاسد اللي سمم روحك ،

توبتي ؟
مبروك
انتي دلوقتي حره