منتدى الفرح المسيحى - عامل مساعد.....

شوف انا هاقولك على حاجه تساعدك في الحالة اللي انت فيها دي.
فاكر المعادلات الكيميائية اللي كنا بناخدها في المدرسة ؟
كان فيه حاجه اسمها ( عامل مساعد ). بيسرع عملية التفاعل الكيميائي. فاكره ؟

اهو انا بقي هقولك على عامل مساعد عشان يساعدك في الخروج من حالة ( الحزن او الكآبة او الاحباط او العزلة او الوحده ) اللي انت حاسس بيها.

⬅ روح للحلاق وقص شعرك. او ( للبنات. قصي شعرك واصبغيه ).
لازم تقصر شعرك او تحلقه. اسمع عني. دي نصيحه عن تجربة ادامي.

⬅ وبعد ماتحلق. خد شاور جمييييل. واشتري تي شيرت جديد. وغير استايل لبسك. لو بتلبس كلاسيك البس كاجوال. او العكس.

⬅ حاول تغير في ترتيب غرفتك. ( بدل السرير مكان الدولاب ).

⬅ غير في نظامك اليومي. اصحي بدري وشوف ناس جديده
وماتقعدش على نفس الكافيه القديم.

※ التغيير في الشكل والعادات اليومية بيدي انطباع للنفس انها بتتغير وممكن تتغير. وده بيساعدك كتييييير في عملية التغير اللي انت عاوزها. ( وبالأخص التغيير في الشكل ).
لما تقف ادام المرايه. وتلاقي انسان مختلف في الشكل.
ده بيدخل في ( اللاوعي ) بتاعك. ويحسسك انك فعلا بدأت تتغير.