منتدى الفرح المسيحى - الحب اللى بجد

الحب هو ان صاحبك يضحك عليك لما تقع
يكشرلك لما تغلط
يزعل عليك ولا عمره يزعل منك
مهما تعمل هيفضل يتريق عليك ماتحاولشى
الحب ان نفس صاحبك دا يقسم معاك ساندوتشاته
ولو خلص قبلك ياخدهم تانى منك
الحب احساس شبه احساسك لما تشرب قهوه وتسمع صوت أم كلثوم شغال بعيد تسمع كلمه من كل جمله.
الحب بيتجسد فى ابوك لما يعد يزعقلك
وبعد ساعات
ويمكن لحظات
يقولك انا بس خايف عليك
وامك لما تفضل تقولك انت اكلت! ..... هتاكل!.... اعملك اكل!
وتدخل تخبط فى الاوضه عشان تقفل الشباك اينعم انت صحيت بس كان قصدها خير
الحب انك تلاقى الست دى بتعيط وبكلمه حلوه منك هتشوف نظره متتوصفشى !!
الحب انك تلاقى عيل صغير اول مايبصلك يضحكلك
وحد غريب يدعيلك دعوه من القلب
الحب انك تدى قطه شوفتها عالسلم شويه اكل
وتشيل الهم من قلب بتحبه
الحب هو ألم بيحسسنا اننا عايشين
وضمير يحسسك انك انسان
وقلوب حواليك تحسسك انك هتعيش بسببهم
الحب مش شجره ولمون واتنين حبيبه وانزل بشيشه يافتحى
الحب الحقيقي هو اللى يتوزع على قلوب كتير
ولو انتهى عمره مايبقى حب !