منتدى الفرح المسيحى - سوق حياتك بنفسك

دي الخطوة المهمة و الباقي كِماله..

لو عايز تغير أي حاجة أو تعمل أي انجاز جديد و مختلف في حياتك في خطوة لازم تبدأ بيها..
مهما حاولت تتهرب من الخطوة دي حتلاقي نفسك بتلف و تهري و تتعب طحن و في الآخر ترجع تقف مكانك .. عمرك ما حتتحرك بجد الا لما تقرر تاخدها بجد

الخطوة دي هي
"تولي المسئولية الكاملة عن حياتك بكل اللي فيها و التغيير اللي انت عايز تعمله .. من غير اي تحفظات"
..

القناعة و الاعتراف بده ممكن يفرق في نجاحك فرق المسافة بين الكواكب و ينورلك طرق جديدة عمرك ما كنت تتخيل انها موجودة ..

اهم مظاهر الخطوة دي هو تبطيل الشكوى و اللوم و العتاب و النقد اللي مش جايب همّه .. تبطيل الاعذار المعلبة و الجاهزة لكل حاجة متعطلة او مش ماشية صح
(ايوه.. حتى الاعذار اللي عماله تتنطط في دماغي دلوقتي وانا بقرا و مرعوب لحسن اقتنع)

لو حاجة عاجباني انا اللي مسئول عن صيانتها،
لو مكان مش عاجبني انا اللي مسئول عن و جودي فيه..
لو عايز اغير حاجة انا اللي مسئول عن اني ابدأ فوراً..
لو حاجة اتغيرت في حياتي و مضايقاني انا اللي مسئول عن التعامل مع الموقف بالرفض او بالمحاولة او بالتقبل و التأقلم..
القعدة و الاحاديث اللي بتجيب لورا انا اللي باقعد فيها..
المكان اللي فيه الناس بتتغير للأحسن انا اللي مسئول اني امشي و اروحه ..
انا اللي مسئول اسأل الناس اللي نجحوا عملوها ازاي ..
كل اللي محتاج اتعلمه موجود في الكتب و المدارس و النت و عند الناس اللي عملوه قبلي ...

لو صحيت الصبح في يوم لقيت مافيش حاجة اسمها اعذار .. حتعمل ايه؟
لو معاك ضمان بنجاح اي حاجة تبدأها .. حتبدأ ايه؟

تعالى نبطل هلك و نقصر السكك .. سوق حياتك بنفسك،
نضف كلامك من الشكوى، و دوس بنزين و اتحرك