منتدى الفرح المسيحى - مجموعه اعترافات علي الماشي ..

مجموعه اعترافات علي الماشي ..

اعتراف انا مش قادر اخبي اكتر من كده ، انا عارف اني بزعجكم كتير بكلام مالوش لازمه بس ده كلام ليه لزمه ....انا لما مراتى بتسافر وتروح لمامتها مابنمش حرفيا ولا ساعه حتي ...

https://upload.chjoy.com/uploads/1485541071821.jpeg

دايما في حاجه ناقصه ، ببقي قلقان والبيت بيبقي كئيب... ده رقم 1

رقم 2 ...... انا مكنتش متصور اني فعلا هحبها اكتر اما نتجوز لاني كنت مفكر اني خلاص جبت الاخر يعني قبل الجواز بس بعد الجواز الموضوع اختلف حرفيا ..
حد لازقلك في كل حاجه بتعملها ،
حد بيصلحلك اي غلط بيدعمك في اي وقت حتي وقت مانت بتبقي الاسوء ..

ده الموضوع طلع اكبر من كده مليون مره ،
مش قصه انها مراتي وشريكتي بالعكس ده هي حقيقي وطن ..
انا متخيلتش اني ممكن اتعلق بحد كده انا مش عارف اقولها ازاي بس اما برجع البيت وملقهاش ببقي فعلا زي العيل الصغير اللي تاه في الزحمه من امه ..
انا دايما تايه اصلا في العادي فزحمه الحياه بين شغل ومشاريع بعملها وافشل او معملهاش وافكر بس
واكتئاب وضغوط بس هي دايما الملاك ، البيت ، الهدوء ، الاستقرار
هي الصخره اللي بتتحطم قدامها كل اللي فات وببقي في حاله من السلام النفسي لاقصي درجه

ع فكره بنتخانق كتير برضه وبنبهدل بعض وساعات الجنونه بتطلع وتقولي انا بكرهك مثلا
بس حتي الخناقه مع حد بتحبه بيبقي ليها شكل مختلف تماما وانت في وسط الخناقه بتبقي عاوز تاخده في حضنك وبعدها تكمل خناقه

يمكن انا مش اسعد واحد في الدنيا ومش مخليها اسعد حد في الحياه زي ماهي تستاهل بس انا متخيلتش ان الحب والعشره والبيت والاسره ممكن تبقي احسن من كده حتي في اقصي احلامي وطموحاتي مكنتش عارف ان الجواز حلو وان الحياه في بيت واحد مع حد بيحبك حلوه كده ❤❤

عشان خاطر ربنا اختاروا صح واتجوزوا ومتخافوش المجتمع مقرف والخناقه صعبه ، والظروف وحشه بس انت محتاج حد تحارب معاه كل ده بكل طاقته وطاقتك
اتجوزوااا حد بتحبوه مهما كانت التضحيات ...