منتدى الفرح المسيحى - مصر محتاجة لصلواتكم

https://images.chjoy.com//uploads/im...61651be959.jpg

مصر محتاجة لصلواتكم

يااااااااااااااااااااااااااااااااااااارب
إحنا محتاجين دولة مدنية
ومش عايزين نرجع تانى لفتنة طائفية
عشان خاطر ولادك
إعمل معجزة إلهية

خلى أصواتنا كلها تروح لأحمد شفيق
عشان أكون وتكون برئ
من أى تجاوزات هتحصل
وبلاوى وأخطار فى الطريق

إقتنعوا بيه وبحملته الإنتخابية
وحتى لو مش مقتنعين صوتوله يا بشرية
أصل إحنا مقدمناش حلول
وهى فرصة واحدة لو ضاعت
هنرجع لعصر الجاهلية

كفاية بقة يا مصريين
إنتوا طول عمركم متيقظين
متقولوش إحنا بننتخب شفيق
عشان هو خايين وبيحب المسيحيين

إحنا صدقونى أقل منكم
ليه بتخيرونا وتحيروا نفسكم
مصر دى بلدكم وبلدنا
وفى الثورة إتلطخت بدمنا ودمكم

متقولوش إللى هيختار حد رشحناه
هيدخل النار عشان إحنا معاه
فوقوا وكفاية خربتوا مصر
بنترجاكم إفصلوا الدين عن السياسة
وأعملوا إللى يرضيكوا ويرضى الله

طول عمرنا إيد واحدة هلال وصليب
الجامع قدام الكنيسة ضد الغريب
لا إحنا فكرنا نأذيكم
ولا إنتوا فكرتوا تشعللوها نار ولهيب

إيه إللى جرى ليكوا يا شباب
دى الثورة قامت عشان نعيش أحباب
مش عشان نفرق أبناء الوطن الواحد
ويعيش المسلم والمسيحى أغراب

ليه عملنا ما بينا أحزاب
حتى ميزنا الدين فى الإنتخاب
هو الدين لربنا يا ناس
ولا بقى قانون هيسرى على الأرجاء

مجلس الشعب والشورى وحتى رئيسنا
عايزين نختاره إخوانى أو سلفى عكس إرادتنا
الشعب كله بيقول لا ومليون لأ
لأى حد عايز يخلينا نعيد ثورتنا

هى الثورة إتعملت عشان تسقط النظام
ولسة ميدان التحرير موجود لو إتعكس الكلام
وركبوا الثورة ناس عايزة توصل للحكم
وعندها نية فى كدة من قديم الزمان

ملناش غير ربنا واصله صراخنا
ملناش دلوقتى غير إنه يتدخل ويساعدنا
ويحافظ على مصر شعبه
إللى قال إنها مباركة وبكدة وعدنا

مصر محتاجة لصلواتكم
مصر مستنية ردودكم
يا إما تنكسوا رأسها
يا إما ترفعوا رأسها ورأسكم

إيدينا فى إيد إخواتنا المسلمين
عشان نطهر أرضنا من المفسدين
إللى هيخلوها أفغانستان
يالا نصدهم وندعى ربنا يهديهم أمين

ومحدش يقول صوتى باطل
لو عاجبكوا إللى حاصل
متشجعوش غيركم على كدة
وتهدوا الأمل إللى فاضل

بقلم / الشاعرة القبطية
كرستين ميلاد