منتدى الفرح المسيحى

ممكن تعدي جنبه وكأنه مش موجود ،،
ممكن ترميله ورقه في العربيه اللي هو بيجرها ،،
ممكن تبصله ويصعب عليك انه واقف في البرد بيتابع الطريق علشان لو حاجة وقعت هو يشيلها ،،
بس النهارده واحنا في محل آيس كريم لقيت صاحب المحل مديله كوبايه ايس كريم عاملهاله مخصوص بالمنديل بالملعقه بالغطا بكل حاجة
ومدهوش الكوبايه بقرف ولا من غير نفس ولا كأنه بيحسسه بحاجة ،،
لأ ادهاله بابتسامة زي اللي بيستقبل بيها الزباين بالظبط
الراجل الغلبان شكره وضحك ومسك الكوباية وفي خجل علي وشه وجر عربيته ومشي بعيد ،،

لما تحب تدي واحد حاجة او فلوس او اكل ،،
متحسسهوش انك بتتفضل عليه وتستناه ينهال عليك بسيل الدعاوى والشكر والناس تسمع ،،
او متدهوش وانت قرفان منه وزهقان واللي هو يادي اليوم الاسود حاجة تقرف ودي انا شفتها كتير
اديهاله وانت محسسه ان ربنا اللي باعتهاله من خلالك وانت بس كنت الوسيلة
ولما تكون انت نايب عن ربنا ،،
هتعرف تديهاله بالطريقه الصح اللي تفرحه بيها مش اللي تكسره

فن_العطاء
الدنيا_لسه_بخير
عامل_النظافة_وكوباية_الآيس_كريم