منتدى الفرح المسيحى - مستويات الانجذاب بين الراجل والست

في العلاقة بين الراجل والست چون جراي اتكلم عن ٤ مستويات من الإنجذاب مهمين جدا:

https://upload.chjoy.com/uploads/1485016512231.jpg

١- الإنجذاب العقلي:
يعني إني أكون بحب دماغ الطرف التاني.. شخصيته وطريقة تفكيره بتشدني... عقله وأراءه بيعجبوني... بلاقي نفسي في الكلام معاه في المواضيع المختلفة عامة.

٢- الإنجذاب العاطفي:
يعني أكون حاسس بمشاعر ناحية الطرف التاني. بميل له.. بحبه.. بيوحشني.. بحس ناحيته بمشاعر حب بدرجاتها المختلفة.

٣- الإنجذاب الجسدي:
يعني شكله عاجبني (بغض النظر هو صاروخ ولا لا).. شكله وجسمه وهيئته جذابين بالنسبة لي.

٤- الإنجذاب الروحي:
يعني برتاح للشخص عموما.. :)

لما بتيجي تتجوز مهم يبقو الأربع مستويات دول موجودين.. مش لازم كلهم بنسبة١٠٠٪‏ بس يبقى كل واحد فيهم موجود بنسبة معقولة عشان تتبسطوا مع بعض...
والأهم من كده بقى إنك لازم تبقى فاهم أنهي واحد في الأربعة مهم أكتر بالنسبة لك "انت" أو له وزن أكبر عندك "انت" مش عند المجتمع!

بمعنى أخر: الأربعة أنواع من الإنجذاب مهمين جدا...
بس احنا بنختلف في ترتيب أهميتهم عندنا.
في واحد بالنسبة له اللي فعلا بيجيبه "الإنجذاب العقلي"...
ممكن يتشد لبنت دماغها حلوة بس شكلها عادي أكتر كتير ما يتشد لبنت صاروخ بس دماغها فاضية.

وفي واحد بالنسبة له مش مهم أوي دماغها طالما بحبها وبتحبني وشكلها حلو وواخدة بالها من نفسها وهكذا...
وأنا هنا مش بتكلم عن الإنجذاب بتاع اول ٥ دقايق في العلاقة!
انا بتكلم عن الحاجة اللي بتخلينا مانحسش بنقص بعد فترة من الجواز!

مهم جدا تفهم انت إيه اهم إحتياج في دول بالنسبة لك عشان تختار على أساسه!
لو انت "الإنجذاب العقلي" مثلا حاجة فعلا بتفرق معاك يبقى وارد جدا تلاقي نفسك متجوز واحدة حلوة وبنت ناس وبتحبها بس مش مبسوط معاها او حاسس ان في حاجة مهمة ناقصة!
مابتتشدش لقعدتها ولا كلامها ولا رأيها وعمال تكمل النقص ده برغي مع فلانة وعلانة يمين وشمال!

والعكس! لو انت مهم اوي عندك "الإنجذاب الجسدي" حاول تتجوز واحدة شكلها يشدك عشان ماتحسش إنك عايز تبص برة بالرغم إنها شخصية ودماغ وبتحبوا بعض!

من الأخر.. لازم يكونوا الأربعة موجودين بنسبة.. بس الأهم إنك تفهم نفسك يابن الحلال وتعرف انت بتتشد اكتر لإيه عشان تختار صح وماتبهدلش بنات الناس معاك :)

والكلام ده طبعا للبنات كمان