منتدى الفرح المسيحى - ماتشتكيش لحد غير ربنا

مفيش حاجه بتوجع أكتر من انك تتجرح من حد بتحبه .. وتتخان من حد قريب منك ..
داود النبي ف المزمور رقم 35 لخص مشاعر ناس كتير بتمر بالحاله دي .. لما رفع عينيه ل ربنا وحكاله اللي فيه .. قاله انا موجوع يارب وصعبان عليا من حبايبي .. الناس اللي مشافوش مني غير كل حاجه حلوه ادوني قصاد الحلو مر .. وقصاد الحب عداوه .. ( يُجَازُونَنِي عَنِ الْخَيْرِ شَرًّا )

مع اني ف ازماتهم كنت السند .. وف تعبهم كنت شايلهم علي كفوف الراحه .. كان وجعهم بيوجعني وكان ألمهم بيكسرني ..(أَمَّا أَنَا فَفِي مَرَضِهِمْ كَانَ لِبَاسِي مِسْحًا.. أَذْلَلْتُ بِالصَّوْمِ نَفْسِي )

كل واحد فيهم كان غالي عندي .. كان بيني وبينه عشره وايام .. كان قلبي بيتقطع لما بشوفه مكسور او تعبان .. كنت بجري عليه قبل ما يحتاجلي .. مكنش بيهون عليا اشوفه بيتوجع وافضل واقف ساكت .. ياما دموعي نزلت علي دموعه .. ( كَأَنَّهُ قَرِيبٌ، كَأَنَّهُ أَخِي كُنْتُ أَتَمَشَّى. كَمَنْ يَنُوحُ عَلَى أُمِّهِ انْحَنَيْتُ حَزِينًا )
..
متهيألي داود كتب المزمور ده بدموعه .. دموع قلبه قبل دموع عينيه .. ودموع القلب اصعب من دموع العين .. داود كتب المزمور ده وهو مجروح من اعز الناس لقلبه .. قاله يارب انت شفت وعرفت اللي حصللي .. شفت بعينيك اللي عملوه فيا .. ( قَدْ رَأَيْتَ يَا رَبُّ، لاَ تَسْكُتْ. يَا سَيِّدُ، لاَ تَبْتَعِدْ عَنِّي )
داود مراحش ساعتها عاتبهم ولا اتخانق معاهم .. داود جري علي ربنا بضعفه وقلة حيلته واشتكاله ب دموع .. ومستحيل ربنا يشوف دموعك وانت موجوع ويسكت

خليك زي داود .. متشتكيش لحد غير ربنا .. هو وبس اللي هيعرف ف الجرح يداوي <3 !

'