منتدى الفرح المسيحى

سمكرة و دوكو
تخيل كل ماعربيتك تعطل ..تروح تعملها سمكرة و دوكو من برة .
اقولك ياعم العفشة مفككة و النفسية محتاجة تربيط
تروح مغير الاكصدام
ياعم الازاز معتم و محتاج تنضفه من جوة
تغير المساحات
ياعم البطارية نايمة و مشاعرك محتاجة شحن ..
تقوم مغير الصاج .
ياسيدي غير بطارياتك بدل ما تيجي في يوم تدورها زق تقوللي المهم المنظر ..
طب الزيت ..محتاج تلين افكارك ..
هازود مية كل يوم.
ياعم الباب مش بيقفل و اسرارك كلها برة ..
هارده عالبارد و اربطه بحبل ..
طب حتي تيل الفرامل ..مش هاتعرف توقف نفسك
هامشي علي مهلي و اشد فرامل اليد
طب غير فلاتر البنزين ..النفسية مكتومة
هامشي علي مهلي
الفتيس طيب ..عربيتك مش بتنقل ..سرعتها ثابتة و مملة
بخاف من التغييرات
ياعم دي بقيت تعطل كتير ..
مش مشكلة هابيعها
هاتشتري زيرو؟؟
لا هجيب مستعمل ..بس يكون شكله نضيف!!
خليك كدة اهتم بمنظرك ..اهتم بمشاكلك الخارجية السطحية و سيب الدنيا تخرب جواك ..
او خليكي ..كل ما مشاعرك تتفكك ..زودي الميكب ..اعملي دايت ..غيري الشنطة ..ردي مناخيرك عالبارد ..زودي كريم الاساس
بس ماتلوميش بتاع السمكرة انه ماظبطش الميكانيكا ..بالعكس ده بيداري عالعيوب ..و يخليك تخرب من جوة ..و بعد وقت هاتخرب من برة ..من كتر الدقدقة و من كتر رش الدوكو ..و يتبقالك في الاخر نفسية "رشة برة و جوة "