|
نِفسك تطلع ايه لما تصغر ؟
نِفسك تطلع ايه لما تصغر ؟ العمر بيمر بسرعة أوي! و احنا بنكبر بنتعلم و نعرف حاجات جديدة و بنعيش تجارب مختلفة كل يوم.. التجارب دي بتدخلنا في حالات ذهنية و عاطفية مالهاش حصر و بنطلع منها كلها بدروس و فلسفات و قوانين نطبقها في حياتنا... بعد سنين بنلاقي نفسنا شايلين فوق دماغنا حمل رهيب من المعلومات و القواعد بعضها بنبقى واعيين ليه و معظمها بيبقى متحوش جوانا من غير وعي في صورة عادات و ذكريات و معتقدات و مخاوف .. الخ.. و هووووووب.. أول ما نبدأ نتخيل اننا فهمنا الدنيا و اتعلمنا نعيش بتيجي علينا أوقات و مواقف بنكتشف فيها اكتشاف مهم جدا؛ "ان كل اللي عرفناه و اتعلمناه ده مش شغال.. و ان اهم حاجات محتاجينها في حياتنا ملهاش دعوة بكل الرحلة دي" :) .. اهم حاجات بنحتاجها لنجاح علاقتنا هي الصدق و الحب و الوضوح و التفاهم و التسامح و التقبل و انك تبقى على طبيعتك و ماتحكمش على الناس .. اهم حاجات بنحتاجها للنجاح في حياتنا العملية هي الشجاعة و البساطة و الايجابية و الحلم و التجربة و المثابرة .. اهم حاجات بنحتاجها لاستقرار حالتنا النفسية هي التعبير عن المشاعر و الصراحة و تقدير الذات و التوازن و الفضول و الاكتشاف و النمو و التوكل .. المفاجأة بقى ان الانسان الطبيعي بيتعلم قدر كافي من الحاجات دي و هو عمره ٣ او ٤ سنين!! كل اللي جه بعد كده تفاصيل و تعقيدات و هلك أتفه بكتير من القيمة اللي بنديهاله .. التفاصيل اللي جت بعد كدة مش بس بتضيف علينا أعباء و ضغوط و تفضل فوق دماغنا و تبطئ حركتنا و تلزقنا في الارض !! و مش بس فيها الصح و فيها الغلط و فيها الصدق و الكذب مختلطين.. لأ دي كمان بتنسينا الحاجات الأهم بعد ما كنا عارفينها كويس!! طب بما اننا عايشين عالكوكب و اللخبطة دي تحدي لابد منه، و ان احنا و احنا بنكبر لازم يحصلنا التشويش ده، ف على الاقل خلينا نتأمل النهاردة ١٠ دقايق في المعاني الأصلية دي ... نشوف بتظهر فين في جوانب حياتنا و المواقف اللي حتتظبط لما نرجعهم و نستخدمهم .. يعني مثلاً ؛ "الحب" ايه تعريفه؟ بيظهر فين و امتى في حياتي النهاردة؟ و ايه الجانب اللي في حياتي محتاج "حب" اكتر؟ "البساطة" بتظهر فين؟ و ايه الجانب اللي محتاج "بساطة" اكتر؟... الخ تخيل نفسك بتتعامل مع مواقف حياتك النهاردة بكل النضج اللي عندك بس بمبادئ و إقبال طفل عنده ٤ سنين .. شوف ايه اللي محتاج يتغير.. و جرب و احكي و استمتع بلحظات اليوم من وجهة نظر جديدة |
رد: نِفسك تطلع ايه لما تصغر ؟
ميرسي على مشاركتك الجميلة رينا
|
رد: نِفسك تطلع ايه لما تصغر ؟
مشاركة جميلة جدا ربنا يبارك حياتك |
رد: نِفسك تطلع ايه لما تصغر ؟
ميرسى لمروركم الغالى
:):):):) |
رد: نِفسك تطلع ايه لما تصغر ؟
دائماً مُشاركاتَكْ رائْعة
موضوعك مُمَيز ربنا يبارك خدمتك |
رد: نِفسك تطلع ايه لما تصغر ؟
ميرسى لمرورك الغالى
:):):):) |
| الساعة الآن 01:08 AM |
Powered by vBulletin® Copyright ©2000 - 2025