منتدى الفرح المسيحى - اللقاء الذى طال انتظاره من سنوات-لقاء صحفى مع...

https://upload.chjoy.com/uploads/1483366455661.jpg

لقاء صحفى مع بابا نويل

الصحفى:أنا مبسوط أوى النهارده هتكلم مع شخصية مهمة أوىوكل الأولاد والبنات بيحبوها معايا النهارده بابا نويل..أهلاً بحضرتك
بابا نويل:أهلاً بيك يابنى
الصحفى:ياترى ممكن تعرفنا بحضرتك أكتر؟؟
بابا نويل:أنا اسمى نيقولاس أو نيكولاس ومع مرور الوقت بقت الناس تنادينى سانت كلوز أو بابا نويل يعنى أب الميلاد.
الصحفى:وياترى حضرتك منين؟؟
بابا نويل:أنا أصلاً من مدينة ميرا ودى كانت موجودة فى ليسيا فى قارة آسيا الصغرى(مدينة دمرا فى تركيا دلوقتى).وكنت من عيلة غنية قوى بابا اسمه أبيفانيوس وماما اسمها تونة.
الصحفى:عيلة غنية وحضرتك عملت ايه بالفلوس دى؟؟
بابا نويل:بابا وماما راحوا السما وأنا عندى 16 سنة.فقررت أساعد الفقراء بالفلوس دى.
الصحفى:حضرتك كنت بتشتغل؟؟
بابا نويل:أنا بعدت عن ميرا فترة عشان أقرب من ربنا وأبقى قسيس وكنت بأساعد الفقراء.وبعدها بفترة طويلة أسقف ميرا مات فربنا اختارنى أكون أسقف بعده.
الصحفى:واشمعنا اللون الأحمر فى لبسك؟؟
بابا نويل:ده كان لبس الأسقف وقتها.الكلام ده كان فى القرن الرابع الميلادى.
الصحفى:وايه سر انك تدى الهدايا للأطفال؟؟
بابا نويل:أنا بأحب الأطفال جداً وقت العيد كنت بألف على البيوت وأحط الهدايا والناس نايمة عشان ماحدش يحس بىّ ويشوفنى وبقت عادة كل سنة فى وقت الكريسماس.
الصحفى:أنا اتبسطت أوى بكلامى مع حضرتك..
يالا يا أصحابى أسيبكم عشان أروح أخد هديتى.