منتدى الفرح المسيحى - القطر برضه هيمشي!

معظم الناس بتتشجع وسط بعض...
يلا نروح الجيم بتروح..
ما تيجي نروح الكنيسه بتتشجع...
تعالوا نعمل مشروع كذا..
ما تيجي نبدأ نقرا كذا...
وجودها مع حد تاني بيشجعها وده طبيعي جدا ومفيهوش أي عيب طبعا بالعكس!
شيء عظيم إننا نشجع بعض :)

بس ال challenge فعلا اللي بيبين عزيمتك وقوتك وإيمانك باللي انت بتعمله هو انك تعمله وتثابر عليه حتى لو لوحدك...
انك تفضل تروح الجيم او تقرا الكتاب او تبدأ وتكمل الدراسة او المشروع او اي حاجة مهمة في حياتك حتى لو كل اللي حواليك مخسكعين!

هتلاقي صحابك فالأول بيقولولك خدنا على جناحك يا عم.. شجعني معاك.. كلام من هذا القبيل...
وانا شايفه انه الصح انك تشجعه وتنصحه وتحمسه وكل ده بس ماتقفش كتير..
خليك زي القطر!
القطر بيقف في محطات عشان الناس تركب..
بيوضح بالظبط هو رايح فين.. بيعمل صفارة انه هيبدأ يتحرك بس في الاخر؟ بيمشي!

الناس الجد بس هما اللي بيركبوا...
لو القطر فضل مستني كل واحد بحججه وبظروفه مش هيتحرك عمره.. وده مابيحصلش!
ده حتى لو محدش ركب خالص.. القطر برضه هيمشي!

محدش بيقفش على القطر انه مشي وماستنهوش لأن كلنا عارفين انه قطر مش سواق شخصي بتاعنا!
بالتالي صحابك المكسلين هيتعودوا بعد شوية إنك موتور مكمل بيهم أو من غيرهم..
وده هيخليهم يتلحلحوا عشان يكونوا معاك!

ثقافة "عايز حد يشجعني" في كل حاجة دي..
وثقاقة "تعالى نام جنبي عشان انا مكسل أقوم"
دي ثقافة معوقة جداً وفهم عقيم للصحوبية وسبب من أسباب تخلفنا الحقيقة :)