|
دى حياتك انت ....
انهاردة واحد بعت لي مسج ان البنت اللي بيحبها هتتخطب لواحد تاني عشان ترضي أهلها لكن هي بتحبه هو.. ومن اسبوعين أم حكيت لي ان ابنها اضطر يحول من الدراسة اللي بيحبها للدراسة اللي باباه عايزهاله عشان باباه كان رافض يصرف عليه غير أما يحول! ومن كام شهر واحد أهل مراته أجبروه على شقة معينة وفرح وعفش معين لمجرد انهم مشاركين معاه في فلوس الجوازه! واهل بيحكموا على ابنهم مايتجوزش فلانة لأنها اكبر منه او شكلها مش عاجبهم مع إن هو شايفاها مناسبة ومقتنع تماماً انه هيتبسط معاها ! المشاهد دي متكررة جدا ومش بقدر استوعبها الحقيقة! بغض النظر عن تحليل الأمثلة اللي فوق دلوقتي.. هل الأبوة او الأمومة معناها إني احرم ابني البالغ العاقل عن حقه في اختيار اللي هو شايفه صح وأفرض عليه اللي انا شايفاه صح عشان انا اكبر منه او خايف عليه او بصرف عليه او بساعده؟! هل المجتمع مثلا بيدفع الشباب دفع انه يستقل مدياً عن أهله من بدري مش عشان يريحهم ولا يتحمل عنهم المسئولية لكن مجرد هروب من شعور بالتحكم والقهر منهم او من حمى وحماة عايشين دور الوصي على القُصّر اللي عمرهم ما هيكبروا؟! في أهالي بتفضل تتحكم في ولادهم حتى بعد الجواز! يسموا العيال ايه ويشتروا ايه وتدخل في كل خناقة وحاجة مأساة يعني! أهالينا كلهم فوق دماغنا ومفيش شك إنهم عايزين مصلحتنا وخايفين علينا والواحد المفروض يكرمهم بكل اللي يقدر يعمله لكن الخضوع للتحكمات اللي ما أنزل بها من سلطان واللي تخصك انت شخصيا في حياتك ومستقبلك مش من الأكرام خالص! أكرام الوالدين عبادة مش سلاح بلوي بيه دراع ابني عشان يسمع كلامي! كل واحد من حقه يختار ويقرر ويغلط ويتعلم.. دي الطريقة الوحيدة اللي هيكبر بيها! دورك ك manager (مدير) لحياة ولادك بينتهى في مرحلة معينة وبعدها دورك بيتحول ل (استشارى)consultant! يستشيرك ياخد رأيك إنما مش غصب! خاصة في قرارات مصيرية زي الدراسة والجواز وهكذا! هيكملوا حياتهم ازاي طيب وهما ابتدوها بخطتك انت ورأيك انت ونظرتك انت؟! دي كده مبقتش حياتهم أصلا.. بقت حياتك انت! |
رد: دى حياتك انت ....
فعلا عندك حق
مش كل حاجه نفرض رائينا لازم هما كمان يكون ليهم راى ميرسي كتير على مشاركتك الجميلة رينا |
رد: دى حياتك انت ....
ربنا يبارك حياتك |
رد: دى حياتك انت ....
ميرسى لمروركم الغالى
:):):) |
| الساعة الآن 06:45 PM |
Powered by vBulletin® Copyright ©2000 - 2025