منتدى الفرح المسيحى - شكاك و مش عارف اصدق وعودك..

شكاك و مش عارف اصدق وعودك..
.. معلش يارب حيرتك
انا جدعون انا توما.. عارف يايسوع.. ا!!!! انا برايا ايمان هش.. اااه صدقني.. اللي جوايا قش.. عمري ما صدقتك
كلامنجي.. اقول كلام فيك و احكي و انا من امتي كنت اختبرتك
دول خمس خبزات و سمكتين فضل منهم اتناشر قفة... وانا و الناس عارفة .. و ده من و سلوي.. وده كوز زيت و كوار دقيق ما فضيش .. و ده غراب بيجيبله اكل علشان يعيش.. و برضه اول ما تضيق.. تلاقيني اتخضيت و اتلخبطت.. و قعدت اندب و عن رزقي و دنيتي برعشة سالتك؟!
معلش ما تزعلش ماانا لسه طفل بيحبي في ايمانه..لسه بيشرب لبن ولادقش اللحمة بسنانه.. لسه.. مش عارف اكون واحد من رجالتك
ساعات بتكسف من نفسي لما الاقي عصفور.. واقف ع السور بيتنطط.. مقضيها يوم بيومه مزقطط.. لا مخازن و لا قلق و لا بكام الدولار و الاسعار بقت نار.. و حنجيب منين دول مش بني ادمين دول كفار!!! ...اشوفه اقول لنفسي.. حتة عصفور راح يدينك في شكك
امشي في الشارع طفل لابوه مصدق ماشي في ايده بسلامته.. رغم نحافته..لكن شايفه عضلات و الهيرو بتاعه.. وسع.. مين قدك
و انا عقلي تاعبني.. بدل ما اشتري دماغي و اسلمك حالي... فالح اوي..قال ايه بفكرلك
و دي حتعمل فيها ايه يارب.. ما هي خلاص قفلت.. و دي مش نافعة..و دي لا سكة و لا ممر.. وكانك ما شقتش في يوم بحر.. و لا مشيت بطرس علي مية و خبيت موسي في صخر.. قاعد بدالك علي كرسيك بتفذلك و احسبلك
انت مدبر الكون.. صاحب كلمة كن فيكون.. حتة مخلوق زيي يخططلك؟!!
لا و ايه.. ارفع ايدي و اصليلك.. و اقولك بص يارب حياتي في ايدك.. بس!!! و اول ما اقول بس.. اديك مقترحات و حلولي و افتي و اتشرطلك
و كاني مش مصدق انك تقدر.. كاني مش بتكلم عن قدرتك بتكلم عن عجزك
خايب ما تخدش علي كلامي.. ماتعاملنيش علي غباوتي و هذياني.. عاملني برحمة قلبك
اللي زيي انت قلت عليه بتدور .. خاطي و خايف.. متهور ..لكن قلت انك مهتم بيا.. يعني انا يارب من هنا و رايح راح اكون شغلك
عاوز منك ايمان حبة خردل.. عاوز اتفرج و المس عملك.. سحابة تضلل و عمود نور وسط شعبك
عاوز يارب اشوف حلك..فاس حديد علي المية يعوم.. ايليا لما تديله في السما بصلوة غيوم.. لعازر لما بكلمة صحيته م النوم.. عاوز مجدك