منتدى الفرح المسيحى - مشاكل التواصل بين الرجل و المرأة

أحد مشاكل التواصل بين الرجل و المرأة

الرجل غالبا لا يعبر عن مشاعره ...و لكنه يطلب طلبات محددة

الست تعبر عن مشاعرها ...لكنها لا تطلب طلبات محددة

و دا بيعمل ارتباك للرجل انه مش فاهم هى عايزة ايه تحديدا

مثلا :

الراجل لو حاسس بالجوع (احساس ) هيقول انا عايز آكل بشكل مباشر جدا (افعال )

وحتى لو قال مشاعره ( أنا جعان ) ...الست هتفهم علطول انه عايز ياكل و تجيب الأكل

العكس غير صحيح
أغلب الرجالة لا تفهم
و البعض ممكن يفهم بس بيطنش

يعنى لو انتوا مسافرين و مريتوا على استراحة و قلتيله أنا جعانة
هو هيفضل متردد يعنى يجيب أكل و الا مايجبش أكل ؟
لو مهتم بيسألك اجيب لك أكل ؟
فالست علشان تلف و تدور (كعادتها ) و عايزاه يعزم عليها بجد مش عزومة مراكبية
تقوله : لا مش مشكلة هاكل لما نوصل
فهو يفهمها بالمعنى الحرفى انها مش عايزة و خلاص هيكمل
فهى طبعا تعد مفروسة و تقلب وشها ازاى تقوله انها جعانة و يسيبها جعانة مع انها تمنعت و قالت لا مش مشكلة
فهو يعد محتار و فى حيص بيص هى مالها قلبت وشها ليه

طبعا تكرار المواقف دى ...بيخليه حاسس انه مش عارف يفهمها
ولا يرضيها و يبدأ يطنش كمان مشاعرها لانه مش فاهم ولا عارف يرضيها

مثال تانى :

الراجل لما يحس انه زهقان (مشاعر ) بيقول انا نازل مع اصحابى (افعال )
الست بتعد تقول انا زهقانة (مشاعر)
فهو يفضل محتار طيب انا المفروض اخرجها و الا اسيبها تتفرج على التليفزيون والا اسيبها تكلم صحبتها يعنى هو المفروض يعمل ايه بالظبط ؟؟؟ هو بيبقى محتار ؟؟؟؟؟؟؟؟؟؟؟؟؟
و لو سألها ..تيجى نخرج ؟
هتقوله : لأ مش مشكلة انت تعبان و عايز ترتاح(ياحُنينة)
فهو هيتصرف بناء على الى هى قالته بشكل حرفى تماما
هى بأة كانت عايزاه يلح عليها و يقولها ولايهمك ياحبيبتى التعب يروح و انا معاك
فتعد قالبة وشها و هو مش فاهم

المرأة دايما تلوم الرجل انه مش حاسس بيها
والاحساس دا محدش بيعرف يتعلمه الا بعد عمر طويييييل ربنا يديكى و يدينا طولة العمر
وفيه رجالة بتبلغ من العمر ارذله و هى لسة ماحستش بزوجاتها

الاسهل ان الست تدرب نفسها على انها تطلب الى هى عايزاه بشكل واضح و صريح جدا
هو كدة هيتعلم مع الوقت هى عايزة ايه بالظبط بدل ما يعد يضرب اخماس فى اسداس وهو مش فاهم هو فيه ايه ؟
يعني باختصار لازم تبقي واضحة.... ومحددة.... وصريحة 😄😄