منتدى الفرح المسيحى - الطبطبة مش بايدك ...بكلامك

الطرفين في إحتياج دائم للشعور بالحب .
بس كل واحد فيهم له إحتياج بمفهوم مختلف عن التاني .
المرأة مثلا ( ladies first ) من أهم الاحتياجات للشعور بحب الطرف الأخر ومبادلته نفس الشعور .

هو الإهتمام .

طبعاً الراجل له نفس الإحتياج بس مش أهمهم .

المرأة مهما أتكلمنا عن المساواة وقدرتها علي منافسة الرجال في جميع المجالات الجسدية ( زي رفع الأثقال ) والمجالات العقلية ( حجم مخ المرأة اكبر من حجم مخ الرجل - حقيقة علمية ) ، بردة بتفضل أنثي بكل ما تحويه الكلمة من معاني .

عشان هي عبارة عن مجموعة من المشاعر محشورة داخل هذا الجسد الأنثوي ودي بتَغلُب عليها دايماً ( دة معني ناقصات عقل عشان اللي مايعرفش وحافظ الجملة وخلاص .. أن الحكم بالعواطف بيغلب عند المرأة عن الحكم بالعقل ) .

فا في الأخر بتحتاج للإهتمام ، وأهتمام الرجل بيزيد إحساسها بأنوثتها اللي ساعات بتفقد جزء منها مع إستمرارها في إرتداء الأقنعة الذكورية اليومية بسبب الإعتماد علي النفس أو مواجهة المشاكل وهكذا.

ضعف المرأة قوة .

الإهتمام بالمرأة مسئولية لا تأتي إلا من عند الرجال وليس الذكور ، فالمرأة عندما تشعر بأن همومها وأثقالها تُزاح من علي كتفيها ليتحملها الطرف الأخر بدون شروط فا بنسبة كبيرة تتحرك لا إرادياً من دائرة الإعجاب لدائرة الحب .

بس الراجل غالباً بيشوف الإهتمام غلط ، أو بيشوفه من زاويته هو .
بيشوفه إهتمام بالمشكلات اللي حواليها أو بتواجهها واللي ممكن تكون حلولها عملية فقط ( عشان الرجل عقلاني وأغلب تفكيره بالإهتمام بيكون عملي وأفعال )

أه طبعا المرأة عايزة النوع دة من الإهتمام .. بس في نوع تاني من الإهتمام بالنسبه لها أهم فا بتبقي طماعة ( كينونتها محتاجة دة - حقها - وكمان لو حصلت علي الاهتمام الكامل المطلوب حايجي دورها عشان تبادل الرجل الإحتياج الأول له .. وصدقني عزيزي الرجل .. حاتنبهر )

وهو أنك تهتم بها شخصياً ، بطريقه تفكيرها ، بذوقها ، بتحب ايه وبتكره ايه .
عبر لها عن إهتمامك بالأفعال والكلام ، الكلام الحلو الصادق له تأثير السحر ( بس الرجالة لسانها تقيل في الكلام الحلو وزي البرابانت في اي حاجة تانية )
بس خلي بالك النساء عندهن قدرة عجيبة علي التفريق بين الكلام الصادق والهجص .

إسأل عليها وعلي يومها عدي إزاي ، الطبطبة ( مش بإيدك بكلامك ) الكلام بيهون عليها أي أوجاع ممكن تكون واجهتها وبتشحن طاقتها من تاني .