منتدى الفرح المسيحى - لهذا فقدت عقلى !

1- فقدت عقلى عشان لقيت ناس عندهم إيمان قوى لدرجة أنهم مستعدين يضحوا بحياتهم من أجل إيمانهم لكنهم خايفين حد يسألهم أى سؤال في إيمانهم عشان إيمانهم ضعيف !
2- فقدت عقلى عشان عايش فى مجتمع مريض أخلاقياً منعدم القيم
الكذب بقى اسمه تحوير والإعتداء على حريات الأخرين اسمه معاكسه والسرقة في التجارة بقت شطارة والغش بقي تعاون
3- فقدت عقلى عشان محدش بيعمل شغله بضمير غير لما تديله فلوس زيادة ( بقشيش أو تبس ) وبقى ده الطبيعي ومتقبلينه عادي
4- فقدت عقلى بسبب إختلال الميزان الأخلاقى اللى بنقيم به سلوكياتنا هل هي صحيحة ولا خاطئة فمثلاً التدخين خطية لأنه لا يبني ومضر بالصحة أنما أكلات تانية زي الفسيخ والبيبسي والشيبسي كلها لها أضرار ربما أكثر خطورة من التدخين ومع ذلك نعتبرها عادية انما التدخين خطية .!
5- فقدت عقلى عشان الناس فقدت معني الحياة ومعني اللذة كل حاجة بقت مكررة وغير ممتعة الشباب أصبحوا عواجيز فجأة عايشين بدون هدف أو رسالة كل يوم زي اللى بعده ملل قاتل وموت بطئ ربما أجسادنا عايشة لكن نفوسنا ماتت من سنين
6- فقدت عقلى عشان الناس لسه بيبنوا حياتهم على أراء الاخرين بقي لازم كل واحد يشتري شبكة ب 40000 الف جنيه ويشتري نيش ملوش لزمة لمجرد أن محدش يتكلم عليهم وغيرهم من ملايين العادات والتقاليد والأفكار العقيمة اللى لسه متمسكيين بها لمجرد شكلك يبقي حلو وسط مجتمع مريض
7 - فقدت عقلى عشان الناس بتبذل مجهود غير طبيعي في تحسين مظهرهم الخارجي قدام الناس ومحدش بيصلح من شخصيته من جوه سواء في قيمه أو معتقداته أو طريقة تفكيره أو إتجاهاته في الحياة
8- فقدت عقلى عشان الناس عايشين في سباق وكله بينافس بعض على الفلوس والشغل من غير حتي ما يفكر يقعد مع نفسه ساعة يسأل نفسه ايه الهدف من كل ده ويضيع العمر من غير ما الانسان يعرف رسالته فى الحياة أو يستمتع بحياته .