منتدى الفرح المسيحى - فوائد الشمس لأطفالنا ^

فوائد الشمس لأطفالنا ^_^
ــــــــــــــــــــــــــــــــ
طبعا مش النبات بس اللي بيحتاج الشمس إحنا كمان وأطفالنا بصفة أساسية بتحتاج الشمس ، بس العلاقة مش طردية مباشرة ما بين التعرض للشمس و فوائدها و بتختلف من واحد للتاني على حسب جيناته و صفاته الوراثية : على سبيل المثال الناس البيضة اللي لما تقعد في الشمس بتاخد صبغة ولونها بيتغير لأن الجلد "اتحرق" الناس دي التعرض الكتير للشمس ممكن يعملهم سرطان الجلد : هنتكلم عن الوقت المناسب والمدة بس الأول نعرف إيه فوايدها ^^
ــــــــــــــــــــــــــــــــ
♣ بيقلل ضغط الدم :
و ده وفقاً لدراسة اتعملت في جامعة إدنبرة في اسكتلندا إن امتصاص الجلد للشمس يحفز افراز أكسيد النيتريك في الدم ، والمركب ده بيقلل ضغط دم و ده هيزود بالتالي متوسط العمر للفرد لفوايدة الصحية.
ــــــ
♣ بيزود قوة العظام :
عن طريق فيتامين د و فيتامين د ٣ ... الاتنين بيزودو امتصاص العضم للكالسيوم و طول ما فيتامين د ٣ موجود في الجسم فهو بيقلل نسب الكسر في العضم باحتمالات كبيرة جدا .
ــــــ
♣ بيحسن و ظائف المخ :
عرفنا إنه بيحمي العضم ويقويه بـفيتامين د ، و فيتامين د مش مهم للعضم بس ، لأ ، في دراسة عملها عالم الأعصاب "David Llewellyn" في جامعة كامبريدج في إنجلترا على 1700 راجل و ست عمرهم 65 سنة وأكتر و وجد إن قدرة الإدراك و الفهم أقل في اللي عندهم نسبة أقل من فيـتانمين د ...
مش بس كده ، في دراسة تانية أكدت إن الشمس بتحسن نمو الخلايا العصبية في منطقة "قرن آمون" أو "الحصين" "hippocampus" .... ودي موجودة في المخ و مسئولة عن (تكوين) و (تنظيم) و (تخزين) الذاكرة !!
ــــــــ
♣ بيزود جهاز المناعة :
أشعة الشمس من أحد الطرق لعلاج الصدفية ، واللي هو مرض جلدي بسبب خلل في مناعة الجسم ، كمان بيزود قدرة خلايا الدم البيضاء WBCs و اللي هي أهم عنصر في حماية الجسم من أي دخيل سواء كان فيروس باكتيريا أو فطريات ..
ــــــــــــــــــــــــــــــ
بالنسبة للوقت المناسب لتعريض الطفل لأشعة الشمس يكون الصبح قبل الساعة 10 و قبل المغرب و بكون لمدة 10 دقايق و نبعد تماما عن الشمس من فترة 10 الصبح لحد 4 العصر لأنها بتكون حامية و ضررها أكتر من فايدتها !!
ــــــــــــــــــــــــ