منتدى الفرح المسيحى

من شهرين كنت راجع البيت ع الفجر .. وبتكلم ف الموبايل ف شارع طويل وفاضي .. فجأه لقيت ايد شدت الموبايل من ايديا من ورا ضهري .. بصيت لقيت 3 بلطجيه راكبين موتوسيكل وماسكين ف ايديهم مطاوي .. وف غمضة عين جريوا بالموتوسيكل بعد ما اخدوا الموبايل .. زعلت واتضايقت جدآ لأن الموبايل كان عليه شغل جديد تعبت فيه شهور .. رجعت البيت وانا متضايق ومكتئب ومقولتش لحد .. بعدها ب يوم لقيت ماما واخواتي جايبنلي هديه علشان عيد ميلادي وقتها .. والمفاجأه ان الهديه كانت موبايل .. احسن واغلي واحلي بكتير من اللي اتسرق مني .. واستغربت لما عرفت انهم كانوا مرتبين من شهور انهم يجيبولي هدية عيد ميلادي السنه دي موبايل ..
والشغل اللي كان ع الموبايل القديم ربنا قواني وقدرت اعمل احسن منه .. وف وقت بسيط جدآ
..

ممكن ربنا ياخد منك حاجه بتحبها .. يبعد عنك شخص متعلق بيه .. بس خليك متأكد انه هيعوضك .. هيعوضك بالأحلي والأحسن والأجمل ..
_زي ما عوض ادم وحوا عن هابيل اللي اتقتل علي ايد اخوه وادالهم ابن تاني .. هيعوضك
_ زي ما عوض استير الغريبه واليتيمه عن ايام الشقا والتعب وخلاها ملكه .. هيعوضك
_ زي ما عوض ساره عن سنين الذل والاحتياج ووهبها اسحق ف زمن الشيخوخه .. هيعوضك
_زي ما عوض موسي عن سنين الغربه ف ارض مصر وشق البحر قصاده .. هيعوضك
_زي ما عوض يوسف عن الظلم اللي شافه ف حياته وخلاه الراجل التاني ف حكم مصر .. هيعوضك
_زي ما عوض ايوب عن كل حاجه خسرها و اداله اضعاف اللي راح منه .. هيعوضك
_زي ما عوض بطرس بعد تعب الليل كله وهو بيصطاد وبارك الشبكه ب خير مالوش اخر .. هيعوضك
_زي ما عوض لعازر بعد ايام من الموت ووهبه قيامه وحياه جديده .. هيعوضك

_ ربنا هيعوضك .. ب فرحه مكنتش علي بالك .. ومفاجأه مكنتش تحلم بيها .. هينسيك اللي ضاع منك ويصالح قلبك ب حاجه احلي واحسن .. مش هيسيبك زعلان .. و هيبدل حزنك ب فرحه .. عِنْدَمَا يَمْلأُ فَاكَ ضِحْكًا، وَشَفَتَيْكَ هُتَافًا

'' مينا مجدي ''