باسم يوسف العلمانية هي الحل
 

https://www.christian-dogma.com/im0ph...500&h=281&.jpg




قال الاعلامي الساخر باسم يوسف إن الكلام عن العلمانية دلوقتي يعتبره البعض نوع من الترف في وسط ازمات سكر و اقتصاد و ارهاب و معتقلين وغيره .

واعتبر يوسف أن أحد الأسباب المهمة للأزمة في مصر هي "الاستسلام للابتزاز باسم الدين و الوطنية وده نتاج لعقود طويلة من تقديس المادة دي بالرغم من استخدامها لقمع الحريات اللي الناس كانت بتنادي بيها".

وكتب باسم على حسابه على موقع فيسبوك تدوينة قال فيها : "بعيدا بقى عن ايفيهات الدولار و التلاجة و التطبيل و اللي بيحصل هنا بشكل يومي تعالوا نتكلم على اللي جاي ".

وأضاف "الدين دايما سلاح فعال لما القمع البوليسي ما ينفعش وده أداة مهمة".

وأضاف: "الابتزاز بالدين مكمل للابتزاز بحجة الأمن القومي".

وأشار يوسف إلى أن "الدين اللي الاسلاميين فرحوا بيه و هما بيستخدموه عشان يكسبوا الاستفتاء و بعدين يوصلوا للسلطة باسم ربنا هو هو نفس الدين اللي تم استخدامه عشان يتم التخلص منهم و استحلال دمهم من شيوخ تبع السلطة".

واعتبر أن الحكم باسم "الدين أو الشريعة أو ربنا هو أخطر سلاح ضد الاسلاميين نفسهم بسبب النماذج السيئة و الرعب اللي الناس شافته من الحكم الديني".

ورأى أن الإسلاميين "لو عايزين مصلحة بلادهم فعلا المفروض يبقوا أول ناس يتبنوا العلمانية و المساواة الكاملة بين أفراد الدولة لأن الناس كده حتعرف إن مش حيفرق مين حييجي في الحكم طالما فيه دستور قوي بيحمي الاقليات قبل الاغلبية وبالطريقة دي ماحدش حيحتاج أبو دبابة ييجي يحميه من البلطجي أبو دقن".

وقال يوسف: "طبعا كلمة العلمانية بتجيب ارتيكاريا لناس كتير و بتتحول في مخيلتهم لـ"حرب على الدين وانحلال وكفر والحاد وجنس جماعي في الشارع مليطة بشكل عام الخ".


وأضاف: "ده على أساس إن الدول العلمانية الكافرة الناس ماشية فيها بلابيص على طول مثلا".

عشان كده كنا بندلعها بكلمات لا مؤاخذة علقة زي "دولة مدنية، مدنية بمرجعية دينية، دولة قانون، دولة مواطنة" و دي كلها الفاظ مفرغة من مضمونها طالما انت حطيت احكام الهية من وجهة نظر دين أو مذهب و بتدي ميزة لدين عن التاني، فمواطنة أيه بقى؟

وتابع يوسف أن الغريب في الأمر أن "اللي حيتضايقوا من كلمة العلمانية دول هما أو قياداتهم موجودين و عايشين و مبسوطين في دول علمانية كافرة منحلة و بيمارسوا دينهم بحرية من غير ما حد يضطهدهم ولو حصل فالنظام القضائي في البلاد العلمانية المنحلة دي في نهاية المطاف بينحاز للعلمانية الحقيقية و بيجيب حقه و آخرها موضوع البوركيني لما محكمة فرنسية لغت القرارات دي و انحازت للعلمانية فعلا".

وأضاف: "العلمانية مش معناها إن المسلم ما يمارسش شعائره. أيوه كانت فيه تجربة سيـئة قام بيها اتاتورك بس ما تخليش دي عقدة لان دي مش علمانية ده قمع و ظلم و اضطهاد و سوء استخدام لمصطلح العلمانية".

وختم يوسف مشاركته بالقول "المهم كفاية بقى بلا مواطنة بلا مدنية بلا بتاع اسمها فصل الدين عن الدولة اسمها إن الدولة مش شخص حقيقي الدولة مالهاش دين الدولة ما بتخشش في ترهات الهوية و الكلام الفارغ ده.. اسمها علمانية و العلمانية مش عيب".
https://www.christian-dogma.com/im0ph...=500&q=60&.jpg