منتدى الفرح المسيحى - محتاج ريستارت وأنزل نسخة ويندوز جديدة

عارفين الحد اللي مش بتكرهه بس مش حبيبك،
اللي لما بتفتكره بيجي على بالك كام موقف وحش عملهم فيك في الشغل او في خروجه او مع واحدة كنت ناوي ترتبط بيها ،
وبرضو تفتكرله كام مرة عزمك على عزومة حلوة او اتمشيتوا سوا وفضلتوا تتكلموا عن ظروفكم وأحوالكم وقلوبكم اتفتحت لبعض ..

الشخص اللي مش بتحس انه صاحبك بس لو كنت في مكان غريب هيبقى اقربلك من مفيش ،
ومش بتحس انه عدوك بس في وجود الاصدقاء هو مش من دايرتهم ..

الشخص اللي ممكن يبقى قابلك في موقف بتتخانق فيه مع بلطجية
فدخل دافع عنك ووقف معاك واتجرح وكان ممكن يموت عشانك وربنا جعله سبب ينجيك منهم ..

بس اول ما عرف انك فركشت مع خطيبتك راح واتجوزها وانت كان لسه عندك أمل ترجعوا لبعض ..
الشخص اللي لما بتشوفه بتاخده بالحضن لانك بتحبه ..
ولما بتسيبه بعد الحضن بتحس انك مش مسامحه اوي ..

عارفين النوعية دي من شكل العلاقات ؟
اهو دا تقريباً نفس موقفي ونفس شكل علاقتي مع كل اللي حواليا دلوقتي ..
البلد، الشغل، المجتمع، الناس، القيم، المشاعر ..

في حاجات حصلت في آخر خمس سنين "بوظتني" لو ينفع أقول كده ..
خلت كل المعايير مهزوزة .. خلت الدنيا ملخبطة ..

لو ينفع أقول إني محتاج ريستارت وأنزل نسخة ويندوز جديدة معليهاش أي ملفات مخزنة ولا برامج محتاجة كراك ولا فيروس ..
نسخة جديدة قادرة تشتغل من غير ما تهنج ..
فهيكون دا الاختيار الوحيد اللي نفسي فيه!

على لسان حال أغلب الشباب دلوقتى