منتدى الفرح المسيحى - إحنا عايزين القطة بتاعتنا لامؤاخذة

https://upload.chjoy.com/uploads/147704503061.jpg

القطة الصغيرة اللى فـ الصورة دى مصرية عندها شهر ونصف تقريباً ..
من أقل من أسبوع فات اتسللت فـ الخباثة كده زى أى قطة مشردة أصيلة لـ مطار القاهرة فـ منطقة الشحن ..
شوية بشوية دخلت جوه طائرة الخطوط الجوية الإماراتية اللى رايحة برمنجهام فـ إنجلترا من القاهرة ..
فعلاً إتحركت الطيارة والقطة جواها من القاهرة ..
طول الرحلة 3000 ميل تقريباً ..
وصلت الطيارة لـ إنجلترا و عمال المطار لقوا القطة وسط الشنط ..
سلموها لـ أمن المطار ..
أمن المطار حولها لـ الطب البيطرى فـ برمنجهام عشان يكشفوا عليها ..
هيحطوها تحت الملاحظة الطبية لمدة 14 يوم عشان يتأكدوا إنها خالية من الأمراض ..
الجميل إن الإمارات عرضت إنها تتحمل تكلفة الكشف الطبى ع القطة ع أساس إنها إتلاقت فـ طيارة إماراتية ..
الجميل أكتر إن الناس فـ برمنجهام سموا القطة ( كايرو ) ..
الجميل أكتر وأكتر إن بعد إنتهاء وضع ( كايرو ) تحت الملاحظة الطبية الـ 14 يوم
هيتم عرضها للتبنى من أى أسرة إنجليزية وفعلاً إتعمل إيميل لـ كده من دلوقتى وبدأوا يستقبلوا عليه الطلبات ..
إحنا وصلنا لـ مرحلة إن حتى القطط بقت عايزة تهج ..
فـ أقل من أسبوع ( سافرت أوروبا ، اتعالجت أحسن علاج ، هـ يتم إستضافتها عند ناس تحس بقيمتها ) ..
القطة دى عندها حظ أكتر من حظ 3/4 المصريين ..
السؤال اللى بيطرح نفسه بجد :
( كايرو ) دفعت الـ 400 جنيه رسوم المغادرة ولا طرمخت عليهم ؟ ..
إحنا عايزين القطة بتاعتنا لامؤاخذة