الإكتئاب مرض مش خطية.. محتاج علاج مش محتاج توبة. يعني لما حضرتك تقابل شخص مكتئب ابقى صليله ماشي.. بس اعرف انه محتاج يقعد مع حد متخصص ولو لزم الامر أدوية، فا ملوش لازمة خالص انك تفحمه بالكام اية اللي حضرتك حافظهم او نصايح التنمية البشرية اللي حضرتك قريتهم في بوست على النت.

واوعى تقوله "أنا لو مكانك كنت عملت كذا وكذا... "، صدقني أنت لو عشت جوه دماغه وبطريقة تفكيره دي ما هاتقدر تكمل يومين، ومش بعيد تجرب تنتحر (وده طبيعي لمرضى الاكتئاب).

الخلاصة يعني ان الشخص المكتئب ده مش عايش حياة عادية وبيحب الكآبة أو بيستهبل او بيجيله شوية زهق و زعل قبل النوم زي حضرتك، ده حرفياً فقد الاحساس بأي متعة بشكل مستمر ومن غير تأثيرات خارجية.. يعني ممكن يكون الواقع عنده حلو جداً بس دماغه مش قادرة تفرح، بالبلدي كدة "دماغه مبقتش بتاعته"، بيصارع جوه دماغه الملخبطة قبل ما يصارع في الواقع اللي براه..

وفكرة أنه يكمل كل الوقت بكم الصراع الداخلي ده من غير انتكاسة (محاولة انتحار) ده معناه انه "بطل" بيعافر حتى ضد دماغه عشان يقدر يعيش نص الحياة اللي حضرتك عايشها.

فا رجاء محبة عزيزي المؤمن، لما تقابل حد مكتئب.. اسكت.
ووصله بحد متخصص (دكتور مش خادم)، ودي برضو هاتُعتبر خدمة.