منتدى الفرح المسيحى

ممكن تعيش عمرك كله عندك اعتقاد "غلط" انك مريض نفسيًا أو شخص (ماتتعاشرش) ..
ما بتدخلش علاقة غير لما تبوظ..
مابيعيشلكش صحاب..
معندكش شخص واحد تقدر تقول عليه "عشرة عمر"..

فيه احتمال طبعًا يكون كل ده صح وانك مجنون ومحتاج معالجة نفسية ومساعدة طبية من حد مختص..
أو تكون كل الحكاية انك (شخص مختلف) ..
مش شبه اللي حواليك..
بتحب حاجات غريبة

بتحب تجرب وتغامر فبتفشل ..
في الوقت اللي كل الناس حواليك بتختار علاقات مقبولة بأعراف المجتمع التقليدي الغبي بالنسبالك ..
فبيعتبروا نفسهم نجحوا.

كل الناس في ال "كومفورت زون" اللي يريحلهم دماغهم ظاهريًا،
ويخلي شكلهم محترم فيتقبلوا اجتماعيًا بسهولة ويوسعوا دايرة علاقاتهم فيكون عندهم صحاب كتير.
وانت بتفرك..
لما ماترتاحش في علاقة، بتنهيها.
لما ماتلاقيش نفسك وسط دايرة تريحك تمشي وتسيبها.

ظاهريًا كدة، هتبان مجنون .. تعيس .. معندكش حياة
بس الحقيقة انك مبسوط ومتصالح مع نفسك وبتقدرها اكتر من أي حد
ده اللي محدش عايز يشوفه لأنك ببساطة بتفكرهم "بفشلهم هما"
بهشاشة علاقاتهم .. ودوايرهم الوهمية المليانة تمثيل واصطناع سعادة واستقرار..

ماتخلوش حد يوصلكم انكوا تكرهوا نفسكم لمجرد انكم أشخاص اختارت حياتها بطريقة تانية وما مشيتش مع القطيع .
القطيع بيحارب أي غنمة شاردة ويخوفها من الديب ويبصولها نظرة المأسوف على حياتها ..

مع ان الغنمة الشاردة آخر واحدة هتتاكل .. في الوقت اللي بتخرج وتجري وتتنطط وتشم هوا الحرية، هيكون الراعي بيشوي في القطيع غنمة غنمة!
وحتى لو الديب كلها، ما كلنا هيجيلنا يوم ونتاكل..
عالاقل الديب هياكلنا علطول ويريحنا .. مش هيدبحنا، بعدين يشوينا، بعدين يقطعنا زي الراعي اللي عامل نفسه بيحمينا!
من الأخر كده عيش نفسك