منتدى الفرح المسيحى - ربنا أشطر دكتور عظام(اتعالجنا غلط و كسرنا اتجبس غلط)

أكتر حالة صعبة بالنسبه لدكتور العظام ...."الكسر اللي اتجبس غلط"
لإنه بيضطر يفك الجبس ، و يكسر العضم تاني ، و يرجع يجبسه صح م الاول و جديد
العملية دي مؤلمة جدا جدا للعيان

https://upload.chjoy.com/uploads/1475831152583.jpg

اللي بيحصل ف العيادة دا ... هو نفسه اللي بيحصل معانا ف حياتنا
بيحصل معانا لما نتكسر ف حياتنا و نروح ندور علي علاج ف حاجات غلط ..او عند ناس غلط
نروح نلهي نفسنا ف افلام و مسرحيات و خروجات و فاكرين اننا كدا بنتعالج ..
نروح نشحت اهتمام و هيصة و محبة مزيفة من ناس غلط وفاكرين اننا كدا بنتعالج ..

نروح نسمع ناس يدونا من خبراتهم هما و مشاعرهم هما اللي هي ماتنفعناش خالص ... و نعمل اللي بيقولوه و فاكرين اننا كدا بنتعالج
لحد ماييجي وقت نكتشف اننا اتعالجنا غلط و كسرنا اتجبس غلط ....

ساعتها مابنلاقيش قدامنا غير "ربنا"
بعد ما كل حلولنا بتفشل و بعد ما كل اللي روحنالهم جبسونا غلط!!
بس ساعتها ربنا بيضطر "يكسر" الجبس الغلط دا ....
بيضطر "يدغدغ" التشوهات اللي حصلتلنا عشان يصلحنا صح بقي
بيضطر يهد كل معتقداتنا اللي فاكرين انها صح ... ويلغي كل الحلول اللي فاكرين انها جبستنا

https://upload.chjoy.com/uploads/1475831152572.jpg

ساعتها ألم التكسير دا بيبقي لا يحتمل ...
صعب جدا تشوف افكارك اللي فاكر انها صح ... طلعت غلط
صعب جدا تكتشف ان الناس اللي كنت فاكرهم صح ... طلعوا غلط
صعب جدا تتفاجئ ان كل الحلول اللي فاكرها صح ... طلعت غلط

بس لازم يكسر كل دا عشان يصلح علي نضافة ..
لازم يدغدغ كل القديم عشان يجبس صح ...
العملية دي مؤلمة جدا جدا جدا ... بس استحمل
لازم ألم ... عشان تخف

ربنا يسامح اللي جبسونا غلط
ربنا أشطر دكتور عظام

https://upload.chjoy.com/uploads/1475831152551.jpg

Cpd