منتدى الفرح المسيحى - لكن مين يحس بتعبى غيرك!!!!

وساعات يارب الكلام بيفقد معناه معاك... أو مش بيبقى له ﻻزمة أصلا الكلام...
انت بتتكلم بعينيك وفى أحاسيسنا وقلوبنا وتفاعلاتنا اليومية...
لما نغوووص معاك... هناك نجد حياة أخرى...
نفسى أكون زيك يارب... أعرف أحب حبك... وأهتم زيك... وآخد بالى من التفاصيل المحتاجة...
أنا افتقدت ده فى الناس، ومالقيتوش غير فيك...
اعمل مننا مسيح صغير وسط خليقتك...
نفسنا نلاقى من نفسنا و فى وسطنا قلوب شبهك كده... تحسنا وتفهمنا من كلمات ومشاعر وصمت...
اكشف لنا احتياجات بعضنا البعض هناك فى المخدع حيث نلتقى معك...
نمد إيدينا بأعمال الرحمة علشان ننشر ملكوتك...
نبطل بأة الشخط والنتر والحسابات العقلية والمشى ورا القطيع وخلاص...
نرجع لك قبل ما نتكلم أو نتفاعل أو نرد أو نبعت رسالة على الواتس آب...
نسألك قبل ما نفتى ونحلل ونفكر ونصدر أحكام...
نبص للصليب كويس قبل ما نقطع أعضائك من كنائسنا أو بالحرى كنيستك... بس الظاهر احنا نسينا من زمان إن انت ربها... وخلقنا ﻷنفسنا أربابا من بشر تحكم بقلوب حجرية وأصابع غليظة...
بص يارب مشاعرى ملخبطة إزاى ؟!!
أيوة علشان أنا تعبانة...
تعبانة من العالم ده يارب...
لكن مين يحس بتعبى غيرك ؟!!!