منتدى الفرح المسيحى - ارحموهم شويه لو سمحتوا ...

نصيحه للعائلات اللى عندهم بنات

ياريت تربوا بناتكم على انهم كائنات مستقله
تصلح للتعايش لوحدها من غير جواز
وان الجواز ده مش هو اهم حاجه فى الحياه
وان حياة البنت قبل الجواز مش صفر
وان البنت حياتها مش بتبتدى لما تتجوز
بلاش فكره ان البنت زى البضاعه اللى فى المخازن
ومحتاجين نتصرف فيها بسرعه قبل ما تقدم وتفقد قيمتها

عادى جدا ان الواحده متتجوزش وممكن بردو تعيش كويس وتبقى مبسوطه كمان
ياريت ترحموا بناتكم شويه من الضغط بتاع الجواز
وياريت تنبسطوا ببناتكم طول ما هما معاكم
وتخلوا بناتكم حاسين انهم مستريحين فى بيتهم
مش بيجروا ورا أى واحد عشان يتجوزوا ويخلصوا من الضغط اللى معيشينهم فيه

صدقونى فى بلاوى بتحصل بسبب الضغط ده
وبلاش امانه السؤال بتاع
" احنا مش هنفرح بيكى بقى؟؟ "
لأن اجابته سهله قوى :
" ممكن تفرحوا بيا كل يوم من غير جواز لو انتوا عايزين كده ،
وممكن بردو تبقوا كلكم عايشين فى نكد بسبب جوازه غلط "

ارحموهم شويه لو سمحتوا