منتدى الفرح المسيحى - فيا حاجة اتغيرت!

حتي أنتيمي اللي عزل
أغلي صاحب ليا كان
لما شفته في حنة أخته
كان واحشني........بس مش وحشة زمان !
فيا حاجة اتغيرت !

حتي ستي لما ماتت
كنت حاسس اني برضه هموت ساعتها
بس لما الوقت عدا
مبقتش ادمع مهما تيحي كتير سيرتها !
ملامحها ف عنيا اتنست
مبقتش فاكر شكلها غير من صورتها !
فيا أشياء اختفت من طول غيبتها
فيا حاجة اتغيرت!

حتي اللي كنت بحبها
افترقنا..وكل شئ بيننا انتهي
واما رجعت تاني ليا
مبقتش قادر احسها
مبقتش نافع قلبها
مبقتش اصدق اي كلمة تقولها ليا واي كلمة انا قولتها
مبقتش عارف...هي ...هي؟
ولا بقيت واحدة غيرها ؟

حتي (ألبوم الصور)
فيه حاجات انا مش فاكرها !
حتي بيت جدي القديم
شكله بقي زي اليتيم
لما سكانه اختفوا
الحيطان هتفيد بايه ؟!
مبقتش اطيق ولا ثانية فيه

حتي لما قابلت نفسي
صدفة قدام المراية..كنت مستغرب عنيا !

فيا حاجة اتغيرت
بس اموت واعرف ايه هي؟!
والزمن غيرها امتي؟

كل حد زمان فارقني
خد معاه من قلبي حته
اللي خد حتة (حنان)
واللي خد حتة (حنين)
واللي خد حتة (براءة)
واللي خد حتة (سنين)

يا كل اتنين بتحبوا بعض
وشفتوا فرح وعشتوا جرح...وكان ما بينكم عيش وملح
يا كل اتنين بتحبوا بعض
تبتوا جااااااااااااااامد في بعض
انتوا أشباه (السمك)
لو سنين الموج بتعلا
اثبتوا...ما هتغرقوا
اوعوا يوم تتفرقوا
اوعوا تغريكوا الشطوط
أي سمكة تسيب بحورها...المؤكد راح تموت
ضموا بعض وقربوا
اوعوا يوم تتغربوا

وانت لو عايز تفارق.........الفراق هيضرك انت
بكره تسأل برضه نفسك ( فيا حاجة اتغيرت....والزمن غيرها امتي؟)
اوعي يوم متاخدش بالك
وانت بتموت حته..حته !