منتدى الفرح المسيحى - طريقة عمل السمنة البلدي في البيت بالخطوات :

شوفوا احنا طبعا عندنا قشطه فلاحي نشتريها نقشطها من على اللبن ماليش دعوه
الجاموسي ينفع والبقري ينفع الاثنين حلوين والاثنين طعمين
بس البقري بيكون لونها اصفرررر فاقع لونها تسر الناظرين
والجاموسي بيبقى لونها ابيض عاجي كده وممكن نعمل خليط منهم برضه هايمشي
بس الجاموسي الصافي سعرها اعلى جدا فى السوق
والى انا مستعملاه هنا الجاموسي
احنا طبعا بالنسبه ليكى وليا بنبقى محوشين القشطه فى الفريزر فلازم نطلعها تفك خاااااالص
وكمان ما تبقاش بارده اوي تكون درجة حرارة الغرفه كده
لان لو بدأنا شغل فيها وهى بارده اوي مش هاتتحول لزبده بتاتا وايدينا هاتتكسر ضرب ولا حياة لمن تنادي
هانحط القشطه فى حاجه واسعه ونزودها شويه ملح صغيرين قولي مثلاااا لو انتى محوشه حوالي 3 كيلو قشطه حطلهم كبدايه كده معلقه كبيره ملح
رشيها عليهم وبعد كده تنزلي ضرب فى القشطه لما تموتيها
( دي اسمها مرحلة خض القشطه لتحويلها الى زبده )
ونفضل نضرب فيها ونبقى نريح المضرب فى النص عشان ما يتحرقش
والمهم هانفضل نضرب لحد لما نلاقيها عملت تكتلات وفصلت الزبده عن المايه زي الصوره دي بالظبط

https://upload.chjoy.com/uploads/1472984197721.jpg

المهم بعد كده نضربها برضه شويه كده بادينها بقى ونحاول نجمع بادينا التكتلات بتاعتها على بعضها وبعدين نعمل منها كور ونعجنها كده بادينا لحد ما تتخلص من الميه الى فيها
والكور الى هاتتطلع دي هى الزببببببببببده
ايوه صفايح الزبده بس لسه ما ساحتش
وبيكون شكلها كده

https://upload.chjoy.com/uploads/147298427981.jpg

الميه الى هاتطع ما ترميهاش خساره دي بتبقى كلها لبن وفرافيت زبده . ممكن تعملي منها بشاميل او تزوديها لبن وتعمليها منها طاجن معمر زي الفل )

بعد ما نخلص الخطوه الرخمه المتعبه دي نرفعها بقى على النار انا بافضل تعمليها فى تيفال لانها احيانا بتلزق وتبقى رخمه اوي
المهم هاتحطي الكميه الى هى نقول 3 كيلو ونزودها ملح بقى عشان المرته تطلع نحط قولي معلقتين ملح كبيره ونرفعه على النار ولما تسيح نهدي عليها النار اوووووي ونقلبها كل ربع ساعه كده عشان نشوف المرته ما تتحرقش والسمنه كمان
بتاخد على النار من ساعه لساعتين حسب الكميه وجوودة الزبده وحاجات كتير
(ملحوظه مهمه لو هاتعملي كميه كبيره من السمنه وناويه تخزنيها مثلا يبقى الزبده الى تطلع دي اعمليه كور ورشي عليها ملح وسبيها في مصفى لحدتاني يوم هاتلاقيها نزلت مايه كتير وبعد كده تحطيها على النار بقى )

https://upload.chjoy.com/uploads/147298436531.jpg

ولما تبدا المرته ترسى فى الحله كده ويبقى شكلها سمنه يعنى السمنه تفصل عن المرته وطبعا كان فى مايه فى الزبده اتبخرت
وبيبقى شكلها كده

الريم الابيض الى على الوش ده ده بقى تشلوه كده بالراحه بالمعقله وتسبوه فى طبق كده وده انا باسميه المورته البيضاء وطعمها رااائع

https://upload.chjoy.com/uploads/1472984443381.jpg

هانسيبها على النار لحد لما المورته بتاعتها تبقى لونها بني فاتح خااااالص زي كده

https://upload.chjoy.com/uploads/1472984524051.jpg

وبعدين نطفي عليها ونسيبها تستهدى شويه وبعدين نصفيها بمصفى سلك وتطلع فى المصفى المورته الي فوق دي باحبها

وبعدين نعبي السمنه فى برطمانات وتفضل البرطمانات الازاز خصوصا لو هاتخزنيها فتره كبيره

ولو هاتخزنيها كتير اوي زودي الملح الى بتحطيه ساعة ما تيجى تسيحيها على النار وحطي فيها حبوب فلفل اسود مش مطحونه وانتى بتعبيها ويا حبذا لو كنا فى الصيف اوي حطيها فى التلاجة

وده شكلها بالظبط اول ما اتعبت

https://upload.chjoy.com/uploads/147298460131.jpg