منتدى الفرح المسيحى - قالي هاتموتي امتي !

قالي هاتموتي امتي !

سؤال من اب راهب ليا !

كنت باحكيله علي موقف تقيل اوي عيشته و ماكنتش بحكي و بس
كنت بعيطله و بقوله حقي و حصل فيا و ازاي و مش ازاي و كلام كتير كده

و سألني وسط الكلام و قالي حبيبت ابوكي هاتموتي امتي...

هاتموتي !!! ايه ياابونا !
سكت شويه و قولتله اكيييد معرفش

قالي و لو هتموتي بكره بكل تلقائيه قولتله ياريت

قالي حطي دايما قدام عينك ان الدنيا دي هتخلص
ان الشخص الي معاكي انهارده مش اكيد تلاقيه بكره

قالي كده بظبط اوعي تموتي و انتي ظالمه حد !
اوعي تروحي ليسوع و في شكوي منك علي الارض..... ازرعي الخير و سيبيه

قولتله انا بحصد شر

قالي و ماله بركه
المحبه بترحم و بتستر اوعي تزعلي من حد
اوعي تردي شر بشر !
بتحبي الناس دي؟؟؟

قولتله اكيد بس الي حصل ماينفعش يعدي قالي لا ينفع

قالى عاديها و ماتخليش حد يسرق اكليلك....
قالي يابنتي المحبه لا تسقط...

قالي ريحي نفسك و لما تفتكري الموضوع ده صليلهم قالي ماحدش ضامن عمره مش مستاهله نخسر نفس علي امور مش دايمه !