منتدى الفرح المسيحى

من عَشَــرة

http://www.nahwalhadaf.com/Images/107/107-13-01.jpg
من سنين كُتار، من زمان..
قالوا لي: أهم مادة عليك في منهج الإنسان؛ مادة الكلام..
مادة فروعها كتير ومليانة أقسام.
ولأني زَنَقت نفسي، زي العادة، وذاكرت في آخر الأيام..
شوفوا معايا نتيجتي.. شوفوا أنا جِبت كام:
* جِبت 10 من 10... أيوة شاطر، أقول جُمَل متذوَّقة ومترتبة.. أسهل جزء في المادة: إني أقول كلام.
* جِبت 8 من 10... برضه حلوة، أصل اتعودت إني أسمع وعظ من صغري، مافوِّتش نهضة. بس مجرد سمع: أسمع كلام.
* جِبت 6 من 10... قليلة، ما هو ماحدِّش ليه تُقل على القراءة.. ما التزمتش قوي بقراءة أحلى الكلام.
*جِبت 4 من 10... سقطت، بس يمكن بالرأفة أنجح.. هي دي درجتي في إن يبقَى لي وقت أصلِّي وأقول له كلام.
* جِبت (...) من 10... حاجة تكسف.. بس دي الحقيقة.. أنا بصراحة ما عرفتش أعيش الكلام.
نموت في إن إحنا نقول.. واتعودنا نسمع.. قليل ما نقرا.. وأقل ما نصلي..
بس الحقيقة إن ربِّنا بيدور على اللي بيعيش!
أنا مسكت نتيجتي، وقرَّرت قرار..
مش راح أعيد تصحيح الورقة.. لكن هاعيد الامتحان.
والمرة دي هدفي واحد مُحدَّد...
إني أعيش الكلام!