منتدى الفرح المسيحى - رسائل الألم والأمل (قصة تعافي)

https://upload.chjoy.com/uploads/1471992405381.jpg

باختصار.. كنت مدمنة جنس.

دايما كنت حاسة اني فاضية من جوايا وماليش تعريف ولا هوية.. عمري ما حسيت بطعم أي نجاح بحققه في شغلي.. النجاح الوحيد اللي كنت بحس بيه هو شطارتي في اغراء الرجالة.. وقتها كنت بحس اني قوية وقادرة.. كنت بستمتع بسيطرتي ع الرجالة اللي يتمنوا اشارة مني.. لكن في نفس الوقت كنت بحس اني شمتانة في نفسي!.. كأني بعاقبها بنظرة الشهوة اللي بشوفها في عيونهم.. كنت بأكره كل راجل أعرفه.. وكرهت كل الناس حواليا.. وقبلهم كرهت نفسي.
استمر الحال على ماهو عليه لغاية ما قابلت الانسان اللي غيّرلي حياتي من غير ما يقصد!.. كان هو أول حد يقرر انه ينهي علاقته بيا من نفسه.. ودي كانت أول مرة مااكونش أنا المتحكمة في علاقة.. دايما كنت متعودة إني أنا اللي بحط كلمة النهاية وقت ما بزهق، أو لما ألاقي فريسة جديدة أتسلى عليها.. إنما المرة دي حصل العكس.. فجأة لقيتني حبيته من غير ما احس.. فجأة لقيتني ضعيفة ومكسورة ومهزومة.. وعشان مايسيبنيش بقيت اترجاه واتذلل.. كان عندي استعداد أبوس ايده ورجله كمان.. لكنه سابني.
وبعد وقت طويل من الانهيار وأعراض الانسحاب، حسيت ان سنين عمري بتضيع هدر.. زاد جوايا اليأس وحاولت الانتحار أكتر من مرة، لكن كل مرة كانت المحاولة تفشل في آخر لحظة.. وفي يوم سمعت صوت جوايا بيقوللي: "لسة ربنا عايزك تعيشي.. لسة كلمته فيكي ما اتقالتش.. طالما لسة العمر ماخلصش"
كان صعب عليا اعترف قدام نفسي اني حاسة بالعجز ومحتاجة مساعدة.. لكن أول ما دا حصل لقيت أبواب كتير بتتفتحلي.. ومن هنا بدأت سكة التعافي.
في سكة التعافي اكتشفت انا قد ايه محتاجة أحب واتحب بجد.. وإني عمري ما هحس بطعم الحياة طول ما انا خايفة من الحب.
في سكة التعافي بقيت قادرة اشوف نفسي واكون واعية بمشاعري أكتر.. بقيت ما بهربش من عمري اللي فات بكل ما فيه من جرح وألم.. بقيت قادرة أرجع أتصاحب مع نفسي من تاني.. ورجعت ألمس وأحب الطفلة المجروحة اللي جوايا.. الطفلة اللي لما كبرت ماكانتش بتعرف تلاقي قيمة لنفسها إلا في الجنس، لأنها ما اتعودتش تتحب ولا تتقبل إلا من خلاله.
في سكة التعافي بقيت اقدر اتكلم عن الماضي واعبر عن ألمي وانوح ع اللي راح مني.. وفي نفس الوقت ألاقي ناس جنبي تقبلني وتحبني.. وتسندني.
في سكة التعافي بقى عندي أمل.. وبقيت أعرف أحب نفسي وارحمها من جلد الذات اللي اتعذبت منه سنين طويلة.
في سكة التعافي بقيت ألاقي قيمتي في إني موجودة ولسة عايشة.
في سكة التعافي.. بقيت نفسي.