منتدى الفرح المسيحى - امتي ينجح جواز الصالونات ؟

امتي ينجح جواز الصالونات ؟

مبدأيا انجح جواز هو الصالونات لأن العقل بيسبق العاطفه وبالتالي بنرفض التجاوز عن اي عيب في العريس ،
وده عكس جواز العلاقات ( اللي بتسموه الجواز عن حب )
واللي بتتعمي فيه العينين عن اي عيب وبنلبس ف حيطه بعد الجواز .

بس امتي ينجح الصالونات ؟

1- لما نشيل من قاموسنا كلمه انا عايزه اتجوز عن حب ، ونثق ان جواز الصالونات وارد جدا يتحول لحب كبير لو اختارنا صح.

2- لما الوسيط ينقل الخطوط العريضه بصدق للعريس والعروسه عن بعض ، من حيث المستوي الاجتماعي والمادي والعلمي والقناعات الدينيه والقيميه .

3- لما كل واحد فيكم يشوف صوره شخصيه للتاني قبل مايجيي عن طريق صوره بروفايل او اي صوره علشان مانتصدمش ونوفر الزياره والبرتقال .

4- لما نتجنب نسأل في اول مقابله اسأله مصيريه ( هاتشتغلي - هنسكن فين ) ونكتفي بالتعارف لأن الاجابات ممكن تتغير لو حصل اقتناع في تاني مقابله .

5- لما نفهم ان اول مقابله مش كافيه للتقيم ، ونادر لما يحصل فيها اعجاب من الطرفين ف نفس الوقت ولازم مقابله تاتيه لو حصل مجرد قبول مبدأي ف الاولي .

6- لما محدش فينا يبقي مهزوز في القاعده او متوتر و بيسأل زي النيابه او بيجاوب زي المتهم .

7- لما نبطل نقيم العريس بالعربيه او المظهر او طريقه الكلام لأن العريس الطيب الخام اللي ماعملش علاقات وداخل البيت من بابه وقضي طول عمره مذاكره وكفاح ، العريس ده عمره الافتراضي اكتر من المحترف بسنتين .

8- لما نبطل نتجاهل راي ماما خالص او نخضعله خالص ، يعني نعتمد علي انطباعنا واحساسنا مع مشوره الوالدين .

9- لما البنت تشيل من دماغها فكره ان العريس جاي يتفرج وببيع ويشتري فيها لأن العكس وارد جدا ، انه جاي علشان البنت تشوفه وتقرر ينفع ولا لا .

10- لما تتعلمي ازاي تبقي مبهره في اول مقابله بابتسامتك وثقتك ف نفسك وازاي تقيمي العريس صح .

ايهاب معوض