منتدى الفرح المسيحى - ليس سهلا أن تكون زوجا

( أن تتزوج شيء في غاية البساطة ، لكن ليس سهلا أن تكون زوجا ) ...
الفيلسوف " ميغيل دي أونامونو "

فالكاتبة Stephanie Sarkis بتقول في مقالة ليها بعنوان ( 6 اسئلة لازم يتسألوا قبل الجواز )

إن حوادث الطلاق انتشرت كتير الفترة الأخيرة عشان الناس بقت تتجوز من غير ما تركز في حاجات مهمة اوي في العلاقة ,
فعلي قد ما الحب اللي بين الطرفين شئ حتمي و اساسي ,
بس في حاجات تانية جنب الحب لازم تتوجد عشان الجواز ده يستمر بسعادة ..

و لخصت النقاط ديه في 6 مواضيع :

1- العيال : عددهم , حنجيبهم امتي , طب لا قدر الله لو في مشكله هل في اعتراض علي التبني او اطفال الانابيب .... موضوع ده مهم جدا جدا !
و لازم يتناقشوا فيه قبل الجواز , عشان في الارتباط الاتنين مش بس بيقرروا يعيشوا مع بعض , ل
ا ده في بيساهموا اضافه اعضاء جديد في البشريه ,
و هما الاتنين مع بعض بيساهموا في القرار ده !
فمينفعش يكون قراره بس , او قرارها بس ,
و عشان ميحصلش اي مشاكل في المستقبل يستحسن الاتنين يتكلموا مع بعض في النقطه ديه بشكل موضوعي و واقعي .. و بكل صراحة و شفافية

2- التربيه : كتير اوي نعرفهم ممكن يكونوا صديق جدع , بنت لذيذه ,
بس مش كتير ممكن يبقوا اهل صالحين .. , و عشان كده لازم الاتنين يتناقشوا في نظرتهم لموضوع التربيه ,
يعني مثلا التربيه بتتقسم لـ 3 انواع : (laissez-faire و assertiveو aggressive )
من حيث الصعوبه او الشده في التعامل , فشريكك ده حيفضل انهي نوع ,
شريكك ده حيعرف يربي ولادك صح و لا حيضعهم ؟؟!
فهل هو جدير بالثقة ديه و لا حتكتشف فشله في وسط الطريق ؟!! ..
فياما أسر انهارت عشان حد من الطرفين مش فاهم تربية او مش مهتم بيها !

3- الماديات : في مجتمعنا الشرقي , بيترمي كل الحمل علي الرجل و ده مش بس بيأذي الراجل ,
لا ده كمان بيأذي الست , فالقضية مش قضية فلوس , قد فكرة المشاركة في اساس البيت ..
فحتي و لو قرار خاص بالدخول في جمعيات او حتي السلف من الاهل او الاصدقاء ,
لازم يتناقشوا الاتنين حيكون شكل حياتهم الاقتصادية ازاي مع بعض ,
هل في طرف مبذر أو طرف بخيل , هل الاتنين من انصار التحويش و لا من انصار الشراء المستمر ؟
فالنقطة دية كل ما كان عليها توافق كل ما شكلت عنصر نجاح لاصحاب الاسرة

4- الادوار المنزلية : برضة في مجتمعنا , بيترمي كل الاعمال المنزلية علي الست ,
و ده فيه نوع من الظلم او التطرف الإجتماعي , و خصوصا لما الراجل يبقي عامل زي الضيف في بيته !
فياكل و ميشلش طبقه او حتي يغيير و يرمي هدومه في وسط الصالة !
فالحاجات اللي هو بيشوفها طبيعية و عادي , ممكن تبقي مرهقة و فيها نوع من قلة التقدير لزوجته و حبيبته ,,
فلازم يتم تحديد بنود السلوك اللي الاتنين حيمارسوه مع بعض تجاه بيتهم ,
عشان يبقي الموضوع واضح من الأول

5 - الجنس : الموضوع ده شائك بشكل صعب و خصوصا انه بيكون محرج و غريب ,
و مع كدة لازم يتفتح بينهم و تحديدا لو الاتنين خلاص قرروا ان ارتباطهم حاجة مفهاش جدال ,
فالاتنين بيبصوا للجنس ازاي ,
هل طرف منهم عنده مشاكل تجاه الموضوع ده او عنده تعليقات او مخاوف من حاجة مرتبطة بالعلاقة الحميمة ,
فكتير اوي من الاسر بتعيش في صراع لو طرف عنده انحراف ما في ادراك السلوك الجنسي !

6- المستقبل : علي قد ما الموضوع ده ساعات بيتقتل كلاما بين الطرفيين ,
بس لازم يتكلموا فيه كتير و الخطة تكون واضحة و مدعومة بدراسات و خطط بديلة ,
فالاتنين بعد ارتباطهم لو حصل جدال عنيف علي الخطوة اللي جاية حيظهر ريسين علي المركب ,
و اللي اكيد بتكون نهايتها الفشل , فحتي و لو ادعينا ان الراجل هو المايسترو الاساسي للاسرة ,
فهو مش قائد من دماغه او فكره الخاص , أنما هو مسؤول لاتمام الخطة اللي الاتنين اتفقوا عليها سوا ,
فالخطة مش خطه حد بنفسه , أنما الاتنين مع بعض .. !

في النهاية , انت ممكن تحب فلانة او انتي تحبي فلان , و تعيشوا انتوا الاتنين اجمل قصص الحب ,
بس ساعة الارتباط الحب بيضمن تماسك البيت , بس مش شرط نجاحه او اتمام اهدافه ,,

فجميل طبعا اللي يلاقي اللي يحبه و يكون في نفس الوقت شريك ناجح و داعم ليه في الحياة ..

كيرلس بهجت