منتدى الفرح المسيحى - مشروع تخسيس ألألف مزه ( للبنات فقط)

مشروع تخسيس ألألف مزه :
الناس كلها بتعمل مشاريع تسمين وانا باعمل مشاريع تخسيس ، والنيعمه انا بأدمر اقتصاد البلد ،
المهم ندخل في الموضوع
انا علي مدار سنين كتييييييير ومن خلال الالاف الحالات اللي بنقابلها كل يوم (هما مش الالاف قوى على فكره) ،
حاولت اوصل لرابط مشترك بين معظم حالات اكتئاب المزز ،
لقيت ان ( السمنه ) إما بتبقي سبب الأكتئاب ، او نتيجه للاكتئاب ،
وفي الحالتين هاتفضل السمنه كابوس بيهدد اكتر من 25 % من مزز الدنيا ،

طب ايه اسبابها

- احيانا وراثه واحيانا هرمونات ، يعني خلقه ربنا ومش هانعترض .
-غالبا مشاكل وضغوط اسريه ، يارب كل اب وام بينكدوا علي ولادهم يروحوا مارينا
( النار يعني اصلها حر اوي اليومين دول )
- وارد بسبب فشل قصه حب او جواز ، ملعون ابو الحب علي ابو الجواز ، مصدر كل القرف .
- بعضهم بسبب تاخر سن الجواز واحتياج الحب والاسره ، وتنغيص الست الوالده ،
واحباط عام من الحياه و العيشه واللي عايشنها .
- شراهه وحب مفرط للأكل ، والاسم العلمي للحاله دي ( فجعانون اكلينيوس )

وارد تكون البنت مستمتعه بوزنها مهما كان زايد ومتعايشه معاه ودي مافيش عليها خوف و ماليش دعوه بيها ومبسوط انها سعيده بحياتها ،

لكن انا باتكلم عن السمنه المسببه للفشل والاحباط في الحياه عموما ،
دي بقي لازم تخدي فيها قرار فورا،
لانها بتهدمك نفسيا وكمان بتقلل من فرصك لاختيار الشريك ( المز ) ،

لان قناعات الراجل الطفس بالفطره ،

ان المرأه الرشيقه من 60 ك لحد 80 بتبقي مثيره و مقبوله حسب طولها
( الا اذا كان طولها اقل من 60 سم ساعتها وزنها مش لازم يزيد عن 5 ك .. فرخه يعني ) ،

ايه رأيكم نتفق علي خطوات ونتعرف علي بعض ونبقى فريق علشان نشجع بعض ،

نصايح سريعه لانقاص الوزن :

- لاااااازم قرار وإراده وعدم تأجيل وثقه بالنفس ودعاء وطبعا جيم او جري او رياضه وبلاش قاعده البيت ،،
قومي نضفي اوضتك يللا وامسحي سلم العماره .

- حاولي تاكلي في طبق صغير هاتبقي الكميه صغيره ،
و كده كده نفسيا هاتحسي بالشبع مجرد ما يخلص الطبق ( بتشتغلي نفسك ياهبله ) .

- بلاش خالص مياه غازيه .

- بلاش شرب مياه ف وسط الاكل ، مش مهم تزوري وتموتي ف داهيه .

- حاولي تنامي وقت كفايه ، لأن السهر بيحفز الجوع ( بنات كتير بتاكل المخده وهي نايمه ) .

- بلاش چانك فوود ( باتكلم عنجليزي ) يعني وجبات سريعه ياجاهله ،
ولو هاتكلي خليها وجبه اطفال( استعيدي طفولتك بدون عمل بيبي علي نفسك ) ، برضو هاتشبعي ،، وكمان أرخص .

- اوعي تتجاهلي وجبه الفطار ، دي بتحسسك بالشبع طول اليوم ،
كمان الجسم قبل الساعه 10 صباحا بيبقي في قمه قدرته علي الحرق ، داهيه تحرق اللي يزعلك .

- بدل ماتأكلي وجبتين او تلاته جامدين ، كلي 6 وجبات صغيرين ،
يعني كل 3 ساعات فاكهه ، خضار ، ديك رومي ، نص خروف .

- بلاش تصومي فترات طويله او تعملي رچيم قاسي ،
لانك هاترجعي للأكل بشراهه ، وهاتكلي اي حد يقابلك .

- خليكي مثقفه واعملي سيرش عن السعرات ،
ساعتها هاتكلي الاكل اللي يحققلك السعرات اللي انتي محتاجاه مش اكتر ،
او شيلي السعرات من اي اكل هاتكليه ( باشتغلك )

- الاكلات اللي بتنزل الوزن :

افطري بيض - جريب فروت - شوفان ( وصدقونى ما اعرف ايه هو )
- شاي اخضر ( لو حطيتي شاي اصفر علي شاي ازرق هايديكي شاي اخضر )
- شيكولاته غامقه مش عاديه دي بتسد نفسك عن الاكل ،
روحي ياشيخه ربنا يسد نفسك ( عن الاكل بس ) علطول علشان تبقي مزه كده ،

يللا انجزوا مين هايشترك معانا وساعدوا بعض ؟؟