منتدى الفرح المسيحى

صديقة قريبة جدا لقلبي ❤
اول لما باشوفها حقيقي بفرح .. ابتسامتها مش بتفارق وشها ابدا
مرة سألتها انتي ازاي دايما كدة !! انا دايما بشوفك مبسوطة ،،
اكيد عندك مشاكل واكيد بتزعلي من باباكي ، مامتك، اصحابك او حتي خطيبك زي اي حد

قالتلي عادي بيبقي في مشاكل بس انتي خليكي حصالة
مفهمتش طبعا طلبت منها توضحلي

قالتلي انها دايما شايلة معاها مذكرة صغيرة وقلم
كل يوم الصبح من بداية اليوم لو اي حد عمل معاها موقف حلو او فرحها او ضحكوا سوا وكانوا مبسوطين ،،،فهي لما تروح تكتب في آخر اليوم كل المواقف الجميلة اللي حصلت معاها وتكتب مشاعرها في المواقف دي بنفس القوة

مثلا ..

النهاردة خطيبي كلمنى في التليفون حس من صوتي اني زعلانة فقالي انا عارف مفيش غير آيس كريم الفراولة اللي بتحبيه هو اللي هيفكك يلا البسي وهعدي عليكي ونتمشي شويه ..
اه هي حاجة بسيطة بس محبته واهتمامه ليا قدروا يغيروا مودى الوحش تماما وكنت في قمة السعادة والفرح

فبتكمل كلامها وقالتلي لما بكتب كل موقف جميل فلما بيجي من نفس الشخص اى موقف متعب او صعب برجع للمذكرة واقرا المواقف الجميلة بمشاعري الحلوة اللي حسيتها في كل موقف

فالاقي نفسي بجدد طاقه الحب جوايا وممكن تكبر وتكبر بالرغم اننا متخانقين وممكن كمان اروح اغلس عليه واحايله ونتصالح

ختمت كلامها بانها قالتلي احنا بقينا بنفتكر لبعض الوحش وننسي الحلو وعشان كده بنتعب ونزعل وتحصل فجوات بيننا
عجبتنى الفكرة والمبدأ وانك تحوش للي قدامك كل حاجة حلوة عشان هيجي وقت تحتاجلها

خليك حصاله
;););)