منتدى الفرح المسيحى - ليه دايما بنعرف الرد بعد ما الموقف يكون خلص ؟!!

ليه دايما بنعرف الرد بعد ما الموقف يكون خلص ؟!!

الموضوع ده كان عمل لي ازمة في حياتي , اكون بتخانق مع حد و فجأه تحصلي حاجة معرفش ارد ,
لكن يا دوب هو يمشي و الموقف يخلص , أقعد أنا بقي ابدع مع نفسي و الاقي مليون رد كنت ممكن أقوله !!!
بس ليه ؟!! ليه ساعات كتير بنحس أن " دماغنا مش حاضره " ؟!

الموضوع بيبتدي من ساعة ما الانسان بيتعلم الحوار اصلا , و يتربي علي فكرة النقاش نفسها ..
فمثلا بتتربي أن لما حد يسألك " عامل ايه " يبقي الرد من غير تفكير " الحمد لله كويس " ,
فبتجمع شوية أكلشيهات او أستمبات للردود في قاموس تفكيرك ..
و القاموس ده بيتملي علي مدار حياتك بالردود السريعة ..

أما ساعة الموقف الجديد عليك او مثلا النقاش المفاجئ , فأنتا لسه قاموسك مش تقيل في الجزء ده ,
او بمعني أصح الكلام هنا مش زي " أنت عامل ايه " الرد معروف ,,,
و عشان كدة بنلاقي بعض الاشخاص اللي بترد بسرعة او زي ما بيتقال " بتاخد حقها " بالكلام ,
و السبب ببساطه ان دول عدوا علي مواقف مشابهه او حاجات قريبة لكدة .. أما ناس تانية لأ ..

و عشان عقلك ميخلكش تمر بالموقف ده تاني ,
بيقعد يبدع معاك بعد ما الموقف يخلص و يجيبه يمين و شمال و يقولك انت كنت ممكن ترد كدة و هو يرد كدة ,
و تفضل تعمل سيناريوهات ياما في مخك ..

و ده بيبان اوي في لحظات الفراق بتاعة الأحبة و خصوصا لما تبقي لاول مره بالنسبة للشخص ,
فبعد انتهاء الموقف يقعد يقول " انا كنت ممكن اقول كدة " أو " ليه مردتش كدة "
و السبب ببساطة ان ساعتها عقلك بيكون عاوز يملي قاموس الأكلشيهات ..

فعملية استحضار الرد مش عملية سهلة و خصوصا لما يكون لسه العقل بيبدع فيها و بيظبطها ,
اما لو حاجة كدة كدة محفوظة او متعارف عليها فبتبقي اي كلام .. و بتطلع في ساعتها ..
فحتي لو عقلك فضل يأنبك انك معرفتش ترد ساعتها عشان يعلمك و يطور منك ,
فبلاش انت كمان تقسو علي نفسك و تعاملها بتقليل لإن الموضوع بيجي مع الوقت و كترة المواقف مش أكتر ...

كيرلس بهجت