حدوث أغرب موقف فى التاريخ.
الحكايه بدأت يوم الأربع اللى فات .....
جرس المنبه يرن كالعاده الساعه سبعه الصبح ، افصله واكمل نوم ، يرن المنبه اللى وراه ، يفضل يرن وافصل ، لغاااااااية ماتيجى الساعه 8 ، اقوم دايخ وانا بصارع مابين انام واقوم ، بأخر فى معاد صحيانى زى أى حاجه بأخرها ، هابطل سجاير بكره ، هانظم أكلى بكره ، هاصلى بكره ، هاصالح فلان بكره ...
المهم بعد خناق مع نفسى أنتهى بفوز الواقع وصحيت ، شربت نسكافيه بلاك يكاد يكون أشبه بالليله السودا من غير سكر، مرارة طعمه بتصيب دماغى بالصدمه القاسيه وإجبارى على اني افوق من كسلى ، بقيت عاده عندى إنى افوق بالصدمات ، حاجات كتير فوقت منها بسبب الصدمه ، لبست وروحت الشغل وأنا فى الميكروباص والجو حر مووووت ، مش طايق نفسى ، أستئذنت الانسه اللى جنبى اجى جنب الشباك عشان ادخن سيجاره ، قابلت الموضوع بكل ترحاب وهى بتسب وتلعن فيا فى سرها مع بصة فاتره مليانه استحقار وكأنها عاوزه تقولى مش قادر تصبر لما تنزل وتولع فى نفسك حتى ، بس كطبيعة شعب مصر اللى فى قلبه مش على لسانه ، المهم جيت جنب الشباك وولعت سيجاره ، وكأنى ولعت فى العربيه ، واحد يقولى ياللى ماعندك ريحة الدم فى اطفال فى العربيه ، وواحده تقول ياستاذ حرام عليك الدنيا كتمه ، اخر واحد قالى يامجنون بتشرب لوحدك احدفلى وحده خرمان من امبارح ماشربتش ، وده اللي نهى الخناقه بضحك وانقذنى من افتراسهم ليا ، رميت السيجاره وحطيت السمعات فى ودانى اسمع اغانى اجنبى كلها دوشه مش فاهم منها حاجه ، بس اهو اى حاجه تسد ودانى عن زحمة الشارع وكلام الناس اللى مليان بصراعات الحياه ، وفجأه السواق يتخانق مع واحد ورا على نص جنيه باقى ،والشتايم بكل انواعها وكانه ضايع منه خمسين الف مش خمسين قرش ، وسط الخناقه والسواق سايق على اقصى سرعه عنده وباصص للراجل ورا بيتخانق ومش مركز للطريق ، وفجأه فقدت الوعى ، كل اللى فاكره ان حاجه ضربت فى دماغى بكل قوه ، مرمى على الاسفلت اللى اتحول لونه للاحمر ، دم سايل منى ومش حاسس بأى الم ، ايه اللى حصل وايه الجثث اللى حوليا دى، حياتى حاسسها بتتسرسب فى ثوانى ، روحى بتطلع منى ومش قادر أمسك فيها ، لسه فى حاجات كتير ماعملتهاش لازم أعملها ، دانا مأجل حاجات لازم اعملها قبل ما اموت ، مستحيل حياتى تنتهى النهايه القاسيه دى ، بصرخ بأعلى صوت ، بس مش سامع صوتى ، ناس بتجرى حوليا وكأن حد كاتم الصوت ، مش سامع ، عاوز حد ينجدنى ، طب حد يعالجنى ، مش عاوز أموت ، كل أوامر عقلى بتفشل ، معدوم من الحركه ، من الكلام ، من السمع ، من حتى المحاوله إنى أنقذ نفسى ، بحور دم نازله منى ، ومش عارف الجرح فين ، حتى دموعى مش قادره تنزل ، حاسس انى مسجون بتخنق بحبل ضعيف مؤلم ، مش عاوز ينهى حياتى مره واحده ومش عاوز كمان يسيبنى اعيش ، وفى عز صراعى مع نفسى واحد يجرى عليا وبكل عزمه يضربنى على كتفى :- أصحى يا أستاذ أخر محطه .
أخر محطه تدينى فرصه جديده لحياه جديده ،
أخر محطه تعمل منى إنسان تانى عارف يعنى إيه مسئوليه ، ومواعيد ، وشغل ، واحلام لازم تتحقق
أخر محطه تعمل منى شخص جديد نضيف من جوه ومن برا ، ميأجلش مواعيد أو يأخر قرارات .
أخر محطه .....